அம்மன் பாட்டு

திக் விஜயம்

2012-01-30T20:53:00.002-05:00

திக்குகள் எட்டும் நடுநடுங்க

திசைகள் யாவும் கிடுகிடுங்க

தேவதை யொருத்தி தேரில் ஏறி

திக் விஜயம் செய்யப் போகின்றாள்!

தகதக வென்றே ஜொலிக்கின்றாள்

பகலவ னைத்தோற் கடிக்கின்றாள்!

மாநில மெல்லாம் மதுரை ஆக்க

மதுரா புரியாள் துடிக்கின்றாள்!

மன்னவ ரெல்லாம் மண்டியிட்டார்

தென்னவள் மீனாள் காலடியில்!

சரணம் சரணம் எனப் பணிந்தார்

கருணைக் கடலின் காலடியில்!

வீரத்தின் தாகம் தணியவில்லை;

வெற்றிகள் பெற்றது பற்றவில்லை!

பற்றிய வாளைச் சுழற்றிக் கொண்டு

சிற்றிடை மீனாள் செல்கின்றாள்!

நான்முகன் நங்கையைப் பணிந்து விட்டான்!

நாரணன் தங்கையை வணங்கி விட்டான்!

கயிலை மலைக்கு வலையை வீசிட

மயிலன்ன மாதங்கி போகின்றாள்!

நற்சிவ கணங்கள் தோற்றோட

நந்தியும் களைத்தே பின்வாங்க

பொற்சிலம் பொலிக்க சிற்சபை ஆடும்

பொன்னம் பலத்தான் வந்து விட்டான்!

உலகில் அழகன் இவன் தானோ

உமையவள் மயங்கும் சிவன் தானோ!

இதயம் தொலைத்த மீனாளும்

இமைக்க மறந்து பார்த்து நின்றாள்!

உடலே வேறாய் ஆனதுவோ

உயிரே அவனிடம் போனதுவோ!

உள்ளம் இரண்டும் இடம் மாற

உறைந்தாள் மீனாள் அக்கணத்தில்!

போரை மறந்தாள் வாள் மறந்தாள்

தொடுத்த அம்பினை விடுக்க மறந்தாள்!

காதல் கனிய கசிந்து நின்றாள்

காதலனும் நிலை புரிந்து கொண்டான்!

சக்தியும் சிவமும் சேர்ந்திடவே

சகல உலகமும் மகிழ்ந்திடவே

மதுரை வருவேன் மணப்பேன் என்றே

மதுர மொழிகள் கூறினனே!

--கவிநயா

படம் இங்கே இருந்து: http://maduraiyampathi.blogspot.com/2010_04_01_archive.html. நன்றி மௌலி.

அம்மா!அம்மா!

2012-01-26T18:34:00.003-05:00

சுப்பு சார் பாடித் தந்ததைக் கேட்டுக் கொண்டே படியுங்கள்!

அம்மா!அம்மா!

"அம்மா!அம்மா!"என்றுன்னை நான் அழைக்கையிலே -நெஞ்சில்
அமுதத்தமிழ்ப் பாமலர் பூக்குதம்மா !

தாய்மையின் மேன்மை நீயே அம்மா,அம்மா!
பெண்மையின் மென்மை நீயே அம்மா,அம்மா!

மெய்ம்மையின் தூய்மை நீயே அம்மா,அம்மா!

புன்மை போக்கும் புடம் உந்தன் பதந்தானம்மா !

"அம்மா!அம்மா!"என்றுன்னை நான் அழைக்கையிலே -நெஞ்சில்
அமுதத்தமிழ்ப் பாமலர் பூக்குதம்மா !

இதமான சுகநாதம் அம்மா,அம்மா!

இதயத்தின் சங்கீதம் அம்மா,அம்மா!

முதலான மதலைச்சொல் அம்மா,அம்மா!

நிதமெந்தன் நெஞ்செல்லாம் நீயே அம்மா!

"அம்மா!அம்மா!"என்றுன்னை நான் அழைக்கையிலே -நெஞ்சில்
அமுதத்தமிழ்ப் பாமலர் பூக்குதம்மா !

அன்பகமே!செண்பகமே!அம்மா,அம்மா!
அஞ்சுகமே!எனக்கபயம் !அம்மா,அம்மா!
நின் கழலில் நான் தஞ்சம் அம்மா,அம்மா!
நின் நிழலே என் மஞ்சம் அம்மா,அம்மா!

"அம்மா!அம்மா!"என்றுன்னை நான் அழைக்கையிலே -நெஞ்சில்
அமுதத்தமிழ்ப் பாமலர் பூக்குதம்மா !

எங்கும் எதிலும் உன்றன் மாயே!

2012-01-23T21:02:00.000-05:00

அம்மா நீயே என்றன் தாயே!

எங்கும் எதிலும் உன்றன் மாயே!

மாயை மயக்கம் நீக்குவாயே!

தாயே கலக்கம் போக்குவாயே!

சேயே என்று அணைத்தென் தாயே!

காயம் யாவும் ஆற்றுவாயே!

பொன்னார் மேனி பகிர்ந்த தாயே!

மின்னார் மெலிந்த இடை கொண்டாயே!

பண்ணால் உன்னைப் பாடும் பெண்ணை

கண்ணால் காத்து அருள் செய்வாயே!!

--கவிநயா

படத்துக்கு நன்றி: http://www.trinethram-divine.com/2011/10/menakshi-as-ardhanariswarar.html#.Tx4QMYF0pGM

இன்றென்ன செய்தாய் என் மனமே?

2012-01-16T21:12:00.001-05:00

சுப்பு தாத்தா சஹானாவில் பாடித் தந்திருக்கிறார். மிகவும் நன்றி தாத்தா!

இன்றும் சூரியன் மறைந்து விட்டது;
இன்னொரு நாளும் முடிந்து விட்டது...
இன்றென்ன செய்தாய் என்மனமே?
கன்றெனக் கரைவாய் அவளிடமே!

பொழுதும் போகுது புவியும் சுற்றுது;
பிறவியும் நீளுது தினந்தினமே...
இன்றென்ன செய்தாய் என்மனமே?
கன்றெனக் கரைவாய் அவளிடமே!

காலம் கடக்குது நேரம் பறக்குது;
கொடுவினை சேருது தினந்தினமே...
இன்றென்ன செய்தாய் என்மனமே?
கன்றெனக் கரைவாய் அவளிடமே!

நாளும் கோளும் உனக்காக
காத்திருக்காது எப்போதும்...
வேளை வந்துன்னைச் சேரும் முன்னே
விரைந்தே பற்றிடு அவள் பதமே!

--கவிநயா

சாரமெல்லாம் நீயே!

2012-01-09T21:57:00.001-05:00

சுப்பு தாத்தா சுகமாகப் பாடித் தந்ததை கேட்டுக் கொண்டே வாசியுங்கள். மிக்க நன்றி தாத்தா!

பாரமெல்லாம் இறக்கி வைக்க பாதங்களைத் தேடி வந்தேன்
சாரமெல்லாம் நீயே யென்று சத்தியமாய் கண்டு கொண்டேன்

சின்னஞ்சிறு மருங்கினிலே செய்யப்பட்டு அணிந்தவளே
கன்னங்கருங் கூந்தலிலே கார்முகிலைக் கொண்டவளே
பென்னம்பெரும் விழிகளினால் பேரருளைப் பொழிபவளே
மின்னலெழிற் புன்னகையால் உள்ளங்களைக் கவர்பவளே

தாமரைப்பூப் பாதங்கள் தரணியெல்லாம் காக்கும்
வந்தவரை வணங்குவரை வாஞ்சையுடன் வாழவைக்கும்
அம்மாவென் றழுதுநின்றால் ஆதரவாய் அணைக்கும்
அன்பாகத் தொழுதுநின்றால் அஞ்சலென்றே உரைக்கும்!

--கவிநயா

படத்துக்கு நன்றி: https://picasaweb.google.com/lh/photo/TkGO9ypT4gpeACkZhet5UA

ஸ்ரீ சாரதா புஜங்கம்

2012-01-02T20:30:00.001-05:00

அனைவருக்கும் இனிய ஆங்கிலப் புத்தாண்டு வாழ்த்துகள்! அன்னையின் அருள் அனைவருக்கும் நிறைந்திருக்கட்டும்!

முன்பு ஒரு முறை மௌலி ஸ்ரீ சாரதா புஜங்கத்தின் பொருளை எழுதியிருந்தார். அதை வைத்து எழுதிய பாடல் இங்கே... நன்றி மௌலி.

காருண்ய தேவதையே
சாந்தம்மிகு சாரதையே
அன்புடனே பதம் பணிந்தோமே - உந்தன்
அருளினையே வேண்டி நின்றோமே!

பொன்கலசம் போல்முலையாள்
தண்கருணை யால்அருள்வாள்
அமிர்தத்தை கரத்தினில் கொண்டாள் - அன்னை
பதம்துதித்தோர் மனதினில் உறைவாள்!

முழுநிலவைப் போல்ஒளிர்வாள்
எழில்மிகுந்த நகைபுரிவாள்
கருணையுடன் காத்திடுவாளே - அன்னை
சாரதையின் பதம்பணிவோமே!

கடைக்கண்ணின் கருணையினால்
கண்ணிமைபோல் காத்திடுவாள்
கலைகளுக்கு நாயகியாவாள் - அன்னை
அழகுக்கெல்லாம் அரசியுமாவாள்!

அணிகலன்கள் அணிந்திருப்பாள்
தங்கம்போல ஜொலித்திருப்பாள்
துங்கைநதிக் கரையோரத்தில் - ஞான
முத்ரையுடன் அருளிடுவாளே!

நெற்றியிலே சுட்டியுடன்
கரத்தில்அக்ஷ மாலையுடன்
அணிகளுடன் ஒளிர்ந்திடுவாளே - அன்னை
அன்புடனே அரவணைப்பாளே!

பண்படிக்க மகிழ்ந்திடுவாள்
பக்தர்களை காத்திடுவாள்
எழில்மிகுந்த எங்கள் சாரதை - அவளின்
அடிபணிந்து வணங்கிடுவோமே!

உச்சிவகிடு மின்னிடவே
நீண்டபின்னல் துலங்கிடவே
குஞ்சலங்கள் அணிந்திருப்பாளே - அன்னை
அலையழகாய் கூந்தல்கொண்டாளே!

மான்போல மருள்விழியாள்
தேன்போல கிளிமொழியாள்
இந்திராதி தேவர் பணிந்திட - அன்னை
காந்திமிகத் திகழ்ந்திடுவாளே!

அழகுக்கு ஒருவருமே
ஒவ்வாத எழிலுடையாள்
மின்கொடிபோல் மேனியைக்கொண்டாள் - அன்னை
அனைத்துக்கும் முதலாய்நின்றாள்!

நிர்மலமாம் குணமுடையாள்
தவமுனிவர் தொழும்படியாய்
உலகெங்கும் அவளாய்நின்றாள் - அன்னை
அவளேதான் உலகாய்நின்றாள்!

பலப்பலவாம் வாகனத்தில்
சுபநவமி காலங்களில்
எழுந்தருளி அருள்புரிவாளே - அன்னை
சாரதையை வணங்கிடுவோமே!

அனல்ரூப மானவளாம்
அனைத்துலகும் ஆள்பவளாம்
இதயமெனும் தாமரைமலரில் - அன்னை
வண்டெனவே ரீங்கரிப்பாளாம்!

நடன,நாத தோத்திரத்தின்
அடிநாதம் ஆனவளாம்
அன்பிற்கே இலக்கணமாவாள் - அன்னை
சாரதையின் அடிபணிவோமே!

முக்கண்ணன் மாதவனும்
முனிவர்களும் தேவர்களும்
நான்முகனும் வணங்கிடுவாரே - சாரதையை
அன்புடனே பணிந்திடுவாரே!

இருசெவியில் குண்டலங்கள்
எழிலுடனே அசைந்திருக்க
ஒளிவீசும் நகைபுரிவாளே - அன்னை
சாரதையை வணங்கிடுவோமே!

--கவிநயா

வாழிய வாழிய வாழியவே!

2011-12-26T17:57:00.001-05:00

மீனாட்சி அம்மை குழந்தைப் பருவம்.

'ஆடுக ஊஞ்சல் ஆடுகவே' மெட்டில்...

வாழிய மீனாள் வாழியவே

வானவர் தானவர் போற்றிடவே!

வாழிய மீனாள் வாழியவே

வையகம் போற்றிட வாழியவே! (1)

(காப்பு)

கணபதி கந்தனும் காத்திடவே

மால் நான் முகனும் வாழ்த்திடவே

அம்மையும் அப்பனும் அருளிடவே

அன்னையும் உதித்தாள் அவனியிலே! (2)

மலயத்துவசன் மனம் மகிழ

மதுரை நகரே மண மணக்க

தழலின் நடுவே தாமரை போல்

தங்கத் தாயவள் உதித்தனளே! (3)

மும்முலை கொண்ட மகள் கண்டு

மன்னவனும் மதி மயங்கினனே

கைத்தலம் பற்றுவன் கண்டவுடன்

மறைந்திடும் எனும் செய்தி கேட்டனனே! (4)

காஞ்சன மாலை மடியினிலே

களிப்புடன் தவழ்ந்தாள் குழந்தையென

கண்டவர் மனங்கள் கனிந்திடவே

‘களுக்’கென்று சிரித்தாள் கன்னங் குழிய! (5)

(செங்கீரை)

வெள்ளித் தண்டைக் கால் நீட்டி

கொள்ளை எழில்மதி முகம் உயர்த்தி

செல்லம் போலே மீனாளும்

செங்கீரை போலே ஆடினளே! (6)

(தால)

உலகிதன் உயிர்களை பிள்ளையென

உதரத்தில் காத்திடும் உமையவளும்

தானே தளிரென பிள்ளையைப் போல்

தாயவள் தாலாட்டில் உறங்கினளே! (7)

(சப்பாணி)

அபயம் அளிக்கும் கரங்களினை

அழகாய்ச் சேர்த்து அன்னையவள்

சகல உயிர்களும் சந்தோஷம் கொள்ள

சப்பாணி கொட்டி மகிழ்ந்தனளே! (8)

(முத்தம்)

பவழம் ஒத்த செவ்வாயில்

பாகை ஒக்கும் தேனொழுக

பக்கம் வந்து பெற்றவர்க்கு

பரிசாய் முத்தங்கள் தந்தனளே! (9)

(வாரானை)

வாவா வென்று தாயழைக்க

வாஞ்சை மீற தந்தை யழைக்க

அகிலத்தை நடத்தும் அங்கயற்கண்ணி

தளிர்ப் பதம் பதித்து நடந்தனளே! (10)

(அம்புலி)

வானில் அம்புலி கண்டனளாம்

விளையாட ஆசை கொண்டனளாம்

சின்னஞ் சிறிய கரம் உயர்த்தி

அவனை அருகினில் அழைத்தனளே! (11)

(சிற்றில்)

வைகை ஆற்றின் கரையினிலே

வாகாய் மணலைக் குவித்தெடுத்து

அதிலே கொஞ்சம் நீர் தெளித்து

அழகாய்ச் சிற்றில் செய்தனளே! (12)

(கழங்காடல்)

கல்லாங் காய்கள் எடுத்து வந்து

கருத்துடன் அவற்றைச் சேர்த்து வந்து

களிப்புடன் அன்னை மீனாளும்

கழங்காடி மிக மகிழ்ந்தனளே! (13)

(அம்மானை)

பந்தார் விரலி பந்தெடுத்து

அதற்குத் துணையாய்ப் பாட்டெடுத்து

புவியினர் எல்லாம் வியந்திடவே

பாங்குடன் அம்மானை ஆடினளே! (14)

(ஊசல்)

மாயை என்னும் ஊஞ்சலிலே

மாந்தரை ஆட்டிடும் மங்கையவள்

மரகத ஊஞ்சல் தனிலமர்ந்து

மதுரை மகிழ ஆடினளே! (15)

வாழிய மீனாள் வாழியவே

வானகம் வையகம் வாழ்த்திடவே

வாழிய மீனாள் வாழியவே

வணங்குவர் உள்ளத்தில் வாழியவே! (16)

--கவிநயா

தேவதையே அருள்வாயோ?

2011-12-19T20:30:00.002-05:00

சுப்பு தாத்தா நீலாம்பரியில் பாடித் தந்திருப்பதை ரசித்துக் கொண்டே வாசியுங்கள்... மிக்க நன்றி தாத்தா!

அன்பாலே பாடுகிறேன்
அம்மா உனக்கு பாடல் ஒன்று
என்பாலே அன்புகொண்டு
நீயும் வர வேண்டுமென்று...

கண் ணசையக் காத்திருக்கேன்
கண்ணெடுத்துப் பாராயோ
விண்ணவருக் கிரங்கினையே
உன்மகளுக் கிரங்காயோ?

உன்நினைவே என்மனதுக்
குணவாக ஆச்சுதடி
உன்பெயரே என்சுவாசக்
காற்றாக வீசுதடி!

காணுகின்ற பொருளிலெல்லாம்
கன்னி முகமேதோணுதடி
ஓடிவரும் ஒலியிலெல்லாம்
கொலுசொலியே ஒலிக்குதடி

பாடிப்பாடி அழைக்கின்றேன்
ஓடோடிநீ வருவாயோ
தேடித்தேடித் தவிக்கின்றேன்
தேவதையே அருள்வாயோ?

--கவிநயா

எப்பொழுதும் உன்நினைவாய் இருக்க வேண்டும்!

2011-12-12T20:30:00.001-05:00

எப்பொழுதும் உன்நினைவாய் இருக்க வேண்டுமே – அம்மா
தப்பாமல் உன்பெயர்உச் சரிக்க வேண்டுமே
முப்பொழுதும் உன்னடிகள் துதிக்க வேண்டுமே - ஒரு
கணப்பொழுதும் உனைமறவா திருக்க வேண்டுமே

பிச்சையென ஒருவரம்நீ கொடுக்க வேண்டுமே – எந்தன்
இச்சையெல்லாம் நீயாக இருக்க வேண்டுமே
துச்சமென இவ்வுலகை நினைக்க வேண்டுமே – அம்மா
மெச்சியுந்தன் புகழைதினம் படிக்க வேண்டுமே

இன்பதுன்பம் இரண்டுமொன்றாய் கொள்ள வேண்டுமே - அம்மா
உண்மைஇன்பம் நீயெனவே உணர வேண்டுமே
பக்திகொண்டு சக்திதன்னை பாட வேண்டுமே – அம்மா
சக்திமீது பித்துகொண்டு வாழ வேண்டுமே!

--கவிநயா

என் தொழில்!

2011-12-05T16:39:00.000-05:00

உன்பதம் போற்றுவதே என் தொழிலாகும்

பொன்பதம் போற்றுதலில் என் னுயிர்வாழும்

திருப்பதந் தனைப் பணிந்தால் தீவினை தீரும்

விருப்புடன் உனைத் தொழுதால் வேதனை மாறும்

மலர்ப்பதம் தனைச்சூட மணமெங்கும் சூழும்

சிலிர்த்துசெந் தமிழ்ப்பாவும் சுனையென ஊறும்

களித்துன்றன் செவியந்த இசையினை மாந்தும்

சிரித்துன்றன் சதங்கைகள் அதற்கிசைந் தாடும்!

--கவிநயா

ஏனிந்த மௌனமடி?

2011-11-28T21:08:00.000-05:00

யாரிடம் சொல்லி அழ – எவர்

மடியினில் சென்று விழ?

தேம்பி யழ வேணும் – அதற்கு

தாயுன்றன் மடி வேணும்

பாரமும் மிகவாச்சு – போகும்

பாதையும் முரடாச்சு

தேகமும் களைச்சாச்சு – உன்னை

தேடி நான் சலிச்சாச்சு

ஏனிந்த மௌனமடி – ஏனோ

எனக்கிந்த துயரமடி

அடைக்கலம் தந்திடவே – உனக்கு

ஏனிந்த தயக்கமடி?

--கவிநயா

தாயே!தயைபுரிவாய்!

2011-11-25T06:35:00.000-05:00

(ஓராண்டுமுன் 'சர்வம் நீயே' வலையில் பதிவிட்ட என் பாடலை
'அம்மன் பாட்டு' அன்பர்களுக்காக இங்கு அளிக்கிறேன்)

1 ) இடர்நீக்கும் ஏகதந்தன் தாயே ! அபிராமி!
விடமுண்டகண்டனில் பாதியே சிவகாமி!
அடைக்கலம் நீயே அம்மா ! ஆதரி காமாட்சி!
மடமதியர் ஆனாலும் மனமிரங்கு மீனாக்ஷி!

2 ) குருகுகனின் தாயே! மலைமகளே ! மாயே!
கருவையும் காக்கும் கர்ப்பரக்ஷாம்பிகையே !
திருமால் சகோதரி ! மகேசன்மனோகரி!
அருள்புரிவாயம்மா! அகிலாண்டேஸ்வரி!

3 ) எள்ளி நகைத்திருந்தோம் இளமையின் இறுமாப்பில்;
துள்ளித்திரிந்தோமே உளத்திலுன்நினைப்பின்றி;
பள்ளத்திலே விழுந்தோம் பணம் தந்த போதையிலே;
தள்ளாமை தாக்கிடவும் தவிக்கிறோம் உனைத்தேடி!

4 ) "முற்போக்கர்" எனும்பேரில் தற்பெருமைபேசும்
அற்பர்களைத்திருத்தி அறவழி காட்டிடம்மா!
நிற்பதும் ,கற்பதும் ,சர்வமும் உன்னால் எனும்
சமர்ப்பணபுத்தி தந்து அருள்புரிவாயம்மா!

5 ) விஞ்ஞானம் எனும்பேரில் நாத்தீகத்தைப்பரப்பும்
அஞ்ஞானியர் அகந்தை அழிந்திடவேண்டுமம்மா!
மெய் ஞானம் அளித்தெம்மை ஆட்கொள்ளவேண்டுமம்மா!
இஞ்ஞாலம் எங்குமின்பம் பொங்கிடவேண்டுமம்மா!

6 )பிழைசெய்வோர் உன்படைப்பே, பொருத்தருள வேண்டுமம்மா!
பழையபடிமாறாமல் தடுத்தருள வேண்டுமம்மா!
அழைக்குமுன் எம்முள்ளே எழுந்தருள வேண்டுமம்மா!
நுழைவாசல் எமன் வரினும் உன்நினைப்பே வேண்டுமம்மா!

7 )சாரதே! சாமளே!சாகம்பரி! சிவானி!
பாரதி!பார்வதி! பரமேஸ்வரி! பவானி!
நாராயணி! நவகாளி! காத்யாயினி!
பூரணி! பவபயஹாரிணி!ஜகத்ஜனனி !

8 )கற்பகவல்லியே!கௌரி!காமேஸ்வரி!
சொற்பதங்கள் கடந்த சுந்தரி!சங்கரி!
கற்பனைக்கெட்டாத அத்புதரூபிணி! உன்
பொற்பதமன்றி புகலேது புவனேஸ்வரி ?

9 )சுத்தசித்தத்தினால் நித்தம் உனைநினைக்கும்
உத்தமபக்தருக்கு முக்திதரும் உமையே!
பித்தரில்பாதியே!சத்தியஜோதியே !
நித்யகல்யாணி !நின்பாதம் சரணமம்மா!

நீயே கதி!

2011-11-21T21:50:00.000-05:00

பலமுறை உனைப் பணிந்தேன்
பதமலர் தனில் விழுந்தேன்
கதியென உனைப் பிடித்தேன் அம்மா
நதியென எனை நனைப்பாய் அம்மா!

பண்ணில் உனைத் தினம்
பாடி அழைக்கின்றேன்
காதில் விழ வில்லையோ?

மண்ணின் மாந்தரெல்லாம்
போற்றும் அன்னைக்கிந்தப்
பிள்ளையொரு தொல்லையோ?

விண்ணின் தேவருக்கு
அருள இரங்கிவந்தாய்
எனக்கு என்று அருள்வாய்?

கண்ணின் மணியுன்னைப்
போற்றித் துதிக்கின்றேன்
காக்க ஓடி வருவாய்

கல்லும் கரையுமிந்தப்
பெண்ணின் கவிகேட்டுன்
உள்ளம் கரைய வில்லையோ?

முள்ளை மலராக்கும்
தீயைப் பனியாக்கும்
பார்வை எனக் கில்லையோ?

உன்னை அன்றி ஒரு
நினைவு எனக்கில்லை
என்றன் அன்பை அறிவாய்

கண்ணில் வழிந்தோடும்
நீரைத் துடைத்திடவே
அன்னை நீயே வருவாய்!

--கவிநயா

அம்மா, அருள்வாய்!

2011-11-14T21:36:00.000-05:00

அம்மா அருள்வாயே

மன அமைதி தருவாயே

சஞ்சலங்கள் ஏதுமின்றி

சந்ததமும் உன்னைப் பாட

(அம்மா)

அன்னை உனையே நாட வேண்டும்

கன்னல் தமிழால் பாட வேண்டும்

முன்னால் பின்னால் மிரட்டும் வினைகள்

தன்னால் பயந்து ஓட வேண்டும்

(அம்மா)

குற்றங் குறைகள் நிறைந்த பிள்ளை

குறுகி உன்னைப் பணியும் வேளை

கற்றை அன்பை நீதான் பொழிந்து

சற்றே மடியில் ஏந்த வேண்டும்

(அம்மா)

கனவிலேனும் உன்னைக் காண

காலடியில் கண்ணீர் வார்க்க

விழியில் வழியும் அன்பைப் பருக

வழியில் நிறைந்த முட்கள் தொலைய

(அம்மா)

--கவிநயா

கடை விழியாலே காத்தருள்வாய்!

2011-11-07T21:33:00.002-05:00

சுப்பு தாத்தா ஹிந்தோளம் ராகத்தில் மிகப் பொருத்தமாக அமைத்திருப்பதைக் கேட்டு மகிழுங்கள்!

மிக்க நன்றி தாத்தா!

கடை விழியாலே காத்தருள்வாய்

கடலினை விஞ்சிடும் கருணை பொங்கும் உன்றன்

கடை விழியாலே காத்தருள்வாய்

சுடலைப் பொடி பூசும் சிவனுடனே

மடல் அவிழ்ந்த மலர் போல் மகிழ்பவளே

(கடை)

விடை தனிலே வருவாய் பதியுடனே

முடி தனிலே ஒளிரும் மதியுடனே

சடை முடியோ னுடன் அருளிடவே

மடை யென அன்பு வெள்ளம் பெருகிடவே

(கடை)

--கவிநயா

மதுரை நகர் தேவியே!

2011-10-31T16:41:00.000-04:00

இன்றைக்கு திவாகர்ஜியின் நேயர் விருப்பம் :)

மதுரைநகர் தேவியே மண்ணாளும் ராணியே

மனதினிலும் குடிபுகுந்து எமைஆள் மீனாக்ஷியே

(மதுரை)

மோகனமாய்ச் சிரிப்பவளே மோகமெல்லாம் எரிப்பவளே

சோகமெல்லாம் தீர்ப்பவளே சுவர்க்கமென இனிப்பவளே

திக்கெட்டும் ஜெயித்தவளே திகம்பரனை மணந்தவளே

சொற்கட்டின் உட்புகுந்து நற்பொருளாய் திகழ்பவளே

(மதுரை)

கிளிப்பிள்ளை போலநானும் உன்பெயரைச் சொல்லிடணும்

சிறுபிள்ளை போலஉன்னைச் சுற்றிச்சுற்றி வந்திடணும்

விழிக்குள்ளே உன்னைவைத்து வாழ்த்திதினம் போற்றிடணும்

வழித்தொல்லை வாராமல்நீ வாஞ்சையுடன் காத்திடணும்

(மதுரை)

--கவிநயா

பாதம் பணிவோம்!

2011-10-24T20:30:00.002-04:00

சுப்பு தாத்தா அழகுற அமைத்துத் தந்த பாடலை கேட்டுக் கொண்டே வாசியுங்கள். மிக்க நன்றி தாத்தா!

ஆதி சக்தியவள்

அழகுப் பாதங்களை

அன்புடனே பணிவோம்

வேத நாயகியை

விஸ்வ ரூபிணியை

விநயமுடன் பணிவோம்

கோதகன்ற வெள்ளை

உள்ளம் உறைகின்ற

உமையவளைப் பணிவோம்

பேதமின்றி எங்கும்

அருளைப் பொழிகின்ற

பொன்மகளைப் பணிவோம்

நாத வடிவான

நங்கை நல்லாளை

நலமுடனே பணிவோம்

ஞான வடிவாக

ஞாலம் காப்பவளை

நேயம்மிகத் தொழுவோம்

--கவிநயா

விடமாட்டேன்!

2011-10-20T20:43:00.000-04:00

விடமாட்டேன்!

மலைமன்னன் கண்மணியே!

                             முக்கண்ணன் பத்தினியே!

                             அலைந்தாடும் மனத்துக்குன்

                              நினைப்பொன்றே நங்கூரம்;

                              புகல்வேண்டும் பக்தர்க்குன்

                              பதமலரே ஆதாரம்.

                            மலைமன்னன் கண்மணியே!
                            முக்கண்ணன் பத்தினியே!

குற்றங்கள் கொஞ்சமில்லை ;

பிழைகளுக்கும் பஞ்சமில்லை;

பெற்ற தாயே! உன்முன்னே

                            ஒப்புக்கொள்ள   அச்சமில்லை.

                               மலைமன்னன் கண்மணியே!
                               முக்கண்ணன் பத்தினியே!

                              களங்கமுள்ள நிலவதனைத்

தலையில் தரிப்பவளே !என்

மலம்படிந்த மனக்கலத்தை

துலக்க உதவு தூயவளே!

மலைமன்னன் கண்மணியே!

முக்கண்ணன் பத்தினியே!

வற்றா அருட்சுனையே!உன்

பொற்றாமரைப் பதங்கள்

பற்றினேன்;விடமாட்டேன்,

                              சற்றே மனமிளகும்வரை!

                             மலைமன்னன் கண்மணியே!
                             முக்கண்ணன் பத்தினியே!

                             காலைப்பிடித்த என்னைக்

                             காப்பாற்றிக்  கரைசேர்க்க

                              காலமின்னுங் கடத்தாமல்

கற்பகமே ! கரம் நீட்டு !

மலைமன்னன் கண்மணியே!

முக்கண்ணன் பத்தினியே!

அன்பைத் தருவாய்!

2011-10-17T19:20:00.001-04:00

படம்: கைலாஷி அவர்களின் வலையிலிருந்து... மிக்க நன்றி, கைலாஷி!

சுப்பு தாத்தா மோகனம் ராகத்தில் பாடியிருப்பதை கேட்டு மகிழுங்கள்! மிக்க நன்றி தாத்தா!

அன்பைத் தருவாய் - அம்மா
அன்பைத் தருவாய் - நெஞ்சில்
அன்பைத் தருவாய் - உன்மேல்
அன்பைத் தருவாய்!

வாயுமைந்தன் நீலவண்ண
ராமன்மேலே வைத்ததுபோல்
வாடாத அன்பை உன்மேல்
வைக்கத் தருவாய்!

காட்டுக்குள்ளே கண்ணப்பர்தம்
சுவாமிமேலே வைத்ததுபோல்
கள்ளமில்லா அன்பை உன்மேல்
வைக்கத் தருவாய்!

ப்ரகலாதன் தந்தை சொல்லை
மீறித்திரு மாலின்மேலே
வைத்ததுபோல் பக்தி உன்மேல்
வைக்கத் தருவாய்!

அவனடியே கதியென்ற
சிவனடியான் மார்க்கண்டேயன்
போலே உன்னைச் சரணடைய
சொல்லித் தருவாய்!

சூடித்தந்த சுடர்க்கொடியாள்
கண்ணன் மேலே வைத்ததுபோல்
கரையில் லாதஅன்பை
உன்மேல் தருவாய்!

ஸ்ரீராம கிருஷ்ணரைப் போல்
அபிராமி பட்டரைப் போல்
அசையாத அன்பை உன்மேல்
அள்ளித் தருவாய்!

--கவிநயா

அவள் அடியே இன்பம்!

2011-10-10T20:48:00.000-04:00

அன்னையின் பதமலரை
அன்புடன் பற்றிக் கொள்வாய்
அவள் அடியே இன்பம்
அறிந்து நீ அமைதி கொள்வாய்

அவள் அடி பற்றிக் கொண்டால்
அல்லல்களும் அல்ல லுறும்
சொந்தமென அவளைக் கொண்டால்
சோதனைகள் ஓடி விடும்

அவள் நாமம் சொல்லச் சொல்ல
நெஞ்சம் செந்தா மரையாய் மலரும்
ஆசையுடன் அவள் வந்து
குடியிருக்கும் கோவில் ஆகும்

அவளைச் சரண் அடைந்தால்
அடைக் கலம் தந்திடுவாள்
பிறவிப் பிணி களைவாள்
பேரின்பம் நல்கிடுவாள்

--கவிநயா

2011-10-06T04:09:00.000-04:00

பராசக்திக்குப் பாமாலை

வெற்றி !வெற்றி !வெற்றியென்று

வெற்றிகீதம் பாடுவோம் !

தீயரைத்துணித்த தாயின்

தசமியைக் கொண்டாடுவோம்.

போரில் அன்னை அசுரர்தன்னை

வென்று கொன்ற நாளிதே!
பஞ்சபாணி வெற்றிவாகை
சூடி நின்ற நாளிதே!

வெற்றி !வெற்றி !வெற்றியென்று

வெற்றிகீதம் பாடுவோம் !

தீயரைத்துணித்த தாயின்

தசமியைக் கொண்டாடுவோம்.

தீயவற்றைத் தூய்மை வெல்லும்

என்றுணர்த்தும் நாளிதே!

வஞ்சகத்தை வாய்மை வெல்லும்

என்றுணர்த்தும் நாளிதே!

வெற்றி !வெற்றி !வெற்றியென்று

வெற்றிகீதம் பாடுவோம் !

தீயரைத்துணித்த தாயின்

தசமியைக் கொண்டாடுவோம்.

அன்னை பராசக்திக்கு நாம்

தமிழ்ப்பாமாலை சூட்டுவோம்!

அன்பே உருவான தாயின்

அடிபணிந்து போற்றுவோம் !

வெற்றி !வெற்றி !வெற்றியென்று

வெற்றிகீதம் பாடுவோம் !

தீயரைத்துணித்த தாயின்

தசமியைக் கொண்டாடுவோம

நான்முகனின் நாயகி!

2011-10-04T22:45:00.001-04:00

சுப்பு தாத்தா பாடித் தந்ததை கேட்டுக் கொண்டே வாசியுங்கள்... மிக்க நன்றி தாத்தா!

வெள்ளைஉள்ளத் தாமரையில் வீணையுடன் வீற்றிருப்பாள்
சொல்லும்மொழி யாவையிலும் சுந்தரமாய் கொலுவிருப்பாள்

பள்ளந்தனைத் தேடிவரும் வெள்ளமதைப் போலவளும்
உள்ளம்நிறை அன்பு செய்தால் உவந்துடனே அருள்வாள்

நானிலத்தை ஆக்குகின்ற நான்முகனின் நாயகியாம்
நான்மறைக ளும்வணங்கும் ஞானவடி வானவளாம்
வானவரும் தானவரும் போற்றுகின்ற தேவியளாம்
காணவரும் அடியவரைப் பேணுகின்ற தாயவளாம்

--கவிநயா

அம்பா நவமணிமாலை

2011-10-04T03:42:00.000-04:00

அம்பா நவமணிமாலை

1) வாணீம் ஜிதசுகவாணீமளிகுல
     வேணீம் பவாம்புதித்ரோணீம் /
    வீணாசுகசிசு பாணீ ம்
   நதகீர்வாணீம் நமாமிசர்வாணீம் //

மறையவளே!கிளியை வெல்லும் மொழியாளே!வண்டன்னக்
கருங்குழலாளே!பிறவிக்கடல்கடக்கப் படகாவாளே!
வீணைக்கரத்தாளே!கிளியமருந்தோளாளே!வாணியும்
பணிந்திடும் பூங்கழலாளே! பவானியே!சரணமம்மா!

2) குவலயதளநீலாங்கீம்
    குவலயரக்ஷைகதீக்ஷிதாபாங்கீம் /
    லோசனவிஜிதகுரங்கீம்
    மாதங்கீம் நௌமி சங்கரார்த்தாங்கீம் //

நீலக்கமல மேனியளே!தரணி காக்க
உறுதிபூண்டொளிரும்   ஓரக்கண்ணாளே!
மானைப்பழிக்கும் எழில்விழியாளே!
மாதங்கி! சரணம்,சங்கரனின் பங்கிணியே!

3)கமலாகமலஜகாந்தாகரசாரச
தத்தகாந்தகரகமலாம் /
கரயுகலவித்ருதகமலாம் விமலாம்
கமலாங்கசூட சகலகலாம் //

கமலையும் கலைமகளும் கமலக்கரமேந்தும்
கமலமன்ன   மென்கரங்களிரண்டிலும்
கமலமலர்கள் தாங்குந் தூயவளே!
சசிதரனின் சகலகலைகளின் வடிவே !

4)சுந்தரஹிமகரவதனாம் குந்தஸுரதனாம்
முகுந்தநிதிஸதனாம் /
கருணோஜ்ஜீவிதமதனாம் ஸுரகுசலாயா
சுரேஷு க்ருதகதனாம் //

எழில்மதிமுகத்தாளே!முல்லைப்பூப்பல்லழகி!
அரும்பொருளின் உறைவிடமே!
கருணையால் காமனை உயிர்ப்பித்த உத்தமி!
சுரரைக்காக்க அசுரரை அழித்தவளே!

5) துங்கஸ்தனஜிதகும்பாம் க்ருதபரிரம்பாம்
    சிவேன குஹடிம்பாம் /
    தாரிதசும்பநிசும்பாம் நர்த்திதரம்பாம்
    புரோ விகததம்பாம் //

தாய்மைபொங்கும் மார்பினளே!அரனணைக்குமேனியளே!
சேயாய் சிவகுகனை உடையவளே!
சும்பநிசும்பரை நசித்தவளே!ரம்பைநடனம் ரசிப்பவளே!
தன்னலமறியா அன்பில் தாயாய்த்திகழ்பவளே!

6)அருணாதரஜிதபிம்பாம் ஜகதம்பாம்
   கமனவிஜிதகாதம்பாம் /
பாலிதசுஜனகதம்பாம் ப்ருதுல
நிதம்பாம் பஜே சஹேரம்பாம் //

கொவ்வைச்செவ்விதழாளே!பாராளும் பேரருளே!
அன்னத்தைவெல்லும் மென்னடையாளே!
தன்னடியார் நன்னலம் காப்பவளே!பூரித்த
பின்னழகி!ஐங்கரனோடருள்பவளே!சரணம்!

7)சரணாகதஜனபரணாம் கருணா
வருணாலயாம் நவாவரணாம் /
மணிமயதிவ்யாபரணாம் சரணாம்
போஜாதசேவகோத்தரணாம் //

"கதி நீயே!"என்போரைக்காக்குங் கருணைக்கடலே!
மதிலொன்பது சூழ அமர்ந்து உலகாளும் மாதரசி!
மணிநிறைப்புனிதஅணி பூண்டவளே! நின்கமலப்
பதம்பணியுமடியாரை உய்விக்கும் உமையாளே!

8)நதஜனரக்ஷாதீக்ஷாம் தக்ஷாம்
பிரத்யக்ஷதைவதாத்யக்ஷாம் /
வாஹீக்ருதஹர்யக்ஷாம்
க்ஷபிதவிபக்ஷாம் சுரேஷு க்ருதரக்ஷாம்//

தாள்பணிவோர் நலங்காக்கும்   நல்லவளே!வல்லவளே!
காட்சிதரும் தெய்வங்களின் தலைவியாய்த் திகழ்பவளே!
வாகனமாம் சிங்கமேறி வளையவரும் சிங்காரி!
தானவரை வதம்செய்து தேவர்குலங்காத்தவளே!

9)தன்யாம் சுரவரமான்யாம் ஹிமகிரி
கன்யாம் த்ரிலோகமூர்த்தன்யாம் /
விஹ்ருதசுரத்ருமவன்யாம் வேத்மி
வினா த்வாம் ந தேவதாஸ்வன்யாம் //

பொருள்வளமருள்பவளே!சுரருந்தொழுஞ் சிவையே!
கிரியரசன் பொன்மகளே!மூவுலக நாயகியே!
தெய்வீகத்தருக்கள் நிறை பூம்பொழிலில் நடைபழகும்
தூயவளே!உனையன்றி வேறுதெய்வம் நானறியேன்!

                                பலஸ்ருதி

ஏதாம் நவமணிமாலாம் படந்தி
பக்த்யேஹ யே பராசக்த்யா :/
தேஷாம் வதனே சதனே ந்ருத்யதி
வாணி ரமா ச பரமமுதா //

நவமணிமாலையிதை ஓதி அம்பிகையைப்பணிவோர்
நாவினிலே நான்முகனின் நாயகியாம் நாமகளும்,
இல்லத்திலே செல்வத்தினை அள்ளித்தரும் திருமகளும்
உள்ளமெல்லாம் மகிழ்ந்து   புரிந்திடுவர் களிநடனம்!
                                -------------------------------------------------

பாதய வா பாதாளே ஸ்தாபய வா
சகலபுவனஸாம்ராஜ்யே /
மாதஸ்தவ பதயுகளம் நாஹம்
முஞ்சாமி நைவ முஞ்சாமி //

அன்னையே!நீ என்னைப் பாதாளத்தில் தள்ளிடினும்,
மன்னவனாய் அகிலத்தையே ஆளும்பதவி தந்திடினும்
என்னிருகை பற்றிவிட்ட உன்னிரு பூம்பாதங்களைப்
பொன்னெனவே போற்றிடுவேன்;ஒருபோதும் விடமாட்டேன்!
http://www.esnips.com/doc/10cc5139-3aae-4dfb-afe1-43c5d2a18016/navamanimalai-kala

பாராளும் பேரழகி !

2011-09-30T08:10:00.000-04:00

பாராளும் பேரழகி !

(அன்னையின் கழல் முதல் குழல்வரை பொங்கும் அழகின் அலைகள்)

சங்கரனின் பத்தினியே!கட்டழகுக் களஞ்சியமே!

எங்கள்மனக்கோயிலிலே கொலுவிருக்கும் அஞ்சுகமே!

அம்மா!அபிராமி!உந்தன் கழல் முதல் குழல் வரை பொங்கும்
அழகின் அலைகளைப் பாடி பாதமலர் பணிகின்றோம்.

[1] உந்தன் திருப்பாதங்களாம்

செங்கமலமலர்களினை

மொய்க்கும் கருவண்டுகளாய்த்

தெரிவதெங்கள் தலைகளன்றோ!

[2] வாழைத்தண்டொத்த உந்தன்

கால்களினழகைப்போற்றி

பாடிஉன்னைப் பணிகின்றோம்

தாயே!நீ அருள் புரிவாய்.

[3] பூரித்த பின்னழகை,

இல்லாத இடையழகை

பாடியுன்னைப் பணிகின்றோம்

பேரருளைப் பொழிந்திடுவாய்.

[4] தாய்மை எனும் தனியழகுன்

மேனியிலே பொங்குதம்மா!

ஜகத்ஜனனி!மங்களமெங்கும்

பொங்கிடவே அருள் புரிவாய்.

[5] பூங்கணைகளைத்தாங்கும்

பூங்கரத்தின் பேரழகை

பாடியுன்னைப் பணிகின்றோம்

தூயவளே!அருள்புரிவாய்.

[6] உந்தன் செந்தளிர்விறல்கள்

'அபயம்' காட்டும் அழகை

பாடியுன்னைப் பணிகின்றோம்

அம்பிகையே!அருள்புரிவாய்.

[7] குஞ்சுக்கிளியும்,கரும்புமுன்

வேயுறு தோள்களிலே

கொஞ்சுகின்ற அழகுதனைப்

பாடியுன்னைப் பணிகின்றோம்.

[8] திருத்தாலி நெளிந்திடுமுன்

சங்குக்கழுத்தழகை

பாடியுன்னைப் பணிகின்றோம்

அன்னையே!அருள்புரிவாய்.

[9] தண்ணொளி தவழுமுந்தன்

பொன்வதனம் கண்ட நிலா

முட்டாக்கு போட்டொளிய

முகில் தேடி ஓடுதம்மா!

[10] குங்குமப்பூவிதழில்

புன்னகை கண்டதாலே

உண்டான போதையிலே

உருண்டு பூமி சுழல்கிறதோ?

[11] முல்லைப்பூச்சரம்போலே

ஒளிர்ந்திடுமுன் பல்லழகை

பாடியுன்னைப் பணிகின்றோம்

ஜகதம்பா!அருள்புரிவாய்.

[12] நட்சத்திரமாய் மினுக்கும்

மூக்குத்தி அணிந்த உந்தன்

மூக்கழகைத்துதிபாடி

பணிகின்றோம்.அருள்புரிவாய்

[13] காதளவு நீண்ட உந்தன்

கயற்கண்களில் பெருகும்

கருணையின் பேரழகை

பாடியுன்னைப் பணிகின்றோம்.

[14] காமன் கை வில்போலே

வளையமுந்தன் புருவங்களின்

பேரழகைப் பாடுகின்றோம்

சாம்பவியே!அருள்புரிவாய்.

[15] பனையோலைத் தாடங்கம்

அணிந்த உன் செவியழகை

பாடியுன்னைப் பணிகின்றோம்

சுந்தரியே!அருள் புரிவாய்.

[16] மதிநுதலில் ஒளிரும் உன்

'நெற்றிப்பொட்டு'அழகுதனை

பாடியுன்னைப் பணிகின்றோம்

சங்கரியே!அருள் புரிவாய்

[17] உந்தன் கருங்குழல் கண்டு

மழைமுகில் என்றே மயங்கி

வண்ணத்தோகை விரித்து மயில்

வட்டமிட்டு ஆடுதம்மா!

[18] முகிலிடை மின்னலென உன்

முடியிடையே வகிடுதனில்

சிந்தூர அழகு எங்கள்

சிந்தை கொள்ளை கொண்டதம்மா

சங்கரனின் பத்தினியே!கட்டழகுக் களஞ்சியமே!

எங்கள்மனக்கோயிலிலே கொலுவிருக்கும் அஞ்சுகமே!

அம்மா!அபிராமி!உந்தன் கழல் முதல் குழல் வரை பொங்கும்
அழகின் அலைகளைப் பாடி பாதமலர் பணிகின்றோம்

உன் பாதம் சரணம்!

2011-09-29T09:04:00.000-04:00

சூலம் ஏந்திக்கொண்டு சூலியவள் நம்மை காத்து நிற்கிறாள்
சூழும் பகைதன்னை விரட்டித் துரத்திடவே பார்த்து நிற்கிறாள்
கால தேவனையும் அடக்கி ஆளுபவள் காளி தேவியே
ஞாலம் யாவையுமே போற்றிப் பணியுமவள் புகழைப் பாடியே!

சண்டி என்றாலும் அண்டி வருவோரைக் காத்து நிற்பவள்
கண்டைப் போலவே இனிக்கும் அன்புதனைக் கொடுத்து நிற்பவள்
தீமை அவளைக்கண்டால் தீயைக் கண்டதுபோல் தூர ஓடுமே
நாவை துருத்திவரும் நங்கை அவளைக்கண்டால் நடுங்கிச் சாகுமே!

அன்னை என்றுதன்னை அன்பு செய்வோரைக் காத்து நிற்பவள்
பிள்ளை இவனென்று அணைக்கும் அன்பினிலே கனிந்து நிற்பவள்
சக்தி உன்றன் திருப்பாதம் சரணென்ற எண்ணம் போதுமே
பக்தர் தமைக்காக்க சூலம் அரணென்று வந்து சேருமே!

--கவிநயா

அம்மா வரவேண்டும்!

2011-09-28T00:42:00.002-04:00

செம்மாதுளைச்சிரிப்பு
செவ்விதழில் தவழ எங்கள்
பொம்மைக்கொலுவில் அமர்ந்து
பேரருள் பொழியவேண்டும்!

அம்மா!நவராத்திரியில்
அழைக்கின்றோம் நாங்களுன்னை!
சிம்மவாகனமேறி
சீக்கிரமாய் வரவேண்டும்!

சொக்கனைச் சொக்கவைத்த
கண்ணழகி!மீனாக்ஷி!
இக்கணமே சாக்குபோக்கு
சொல்லாமல் வரவேண்டும்!

அம்மா!நவராத்திரியில்
அழைக்கின்றோம் நாங்களுன்னை!
சிம்மவாகனமேறி
சீக்கிரமாய் வரவேண்டும்!

கொண்டவன் உண்ட நஞ்சை
உந்தன் கற்புத்திறத்தாலே
கண்டத்திலே தடுத்தவளே!
கற்பகமே!வரவேண்டும்!

அம்மா!நவராத்திரியில்
அழைக்கின்றோம் நாங்களுன்னை!
சிம்மவாகனமேறி
சீக்கிரமாய் வரவேண்டும்!

பக்குவமாய் சுண்டல் செய்து
பாயசமும் படைக்கின்றோம்;
நெக்குருக நாங்கள் பாடும்
துதி கேட்க வரவேண்டும்!

அம்மா!நவராத்திரியில்
அழைக்கின்றோம் நாங்களுன்னை!
சிம்மவாகனமேறி
சீக்கிரமாய் வரவேண்டும்!

9ராத்திரி-01: "கொலு" இருக்க வருக!

2011-09-27T20:42:00.001-04:00

அன்பர் அனைவருக்கும் இனிய நவராத்திரி (ஒன்பதிரா) வாழ்த்துக்கள்!

அன்னை எங்கும், என்றும், எப்போதும்...எல்லா இடத்தும் இருப்பவள் தான்!
நம் அம்மாவின் நினைவு அடிக்கடி இருந்தாலும்,
பிறந்த நாள்/மணநாள் போன்ற நாட்களில், பூங்கொத்தும், முத்து மாலையும், புடைவையும் குடுத்து அசத்துவதில்லையா?:)

அது போல், இன்று துவங்கி, ஒன்பது நாட்கள்...
முதல் நாளின் முதல் வேலையாக...
"கொலுவிருக்க வா" என்று அழைத்து,
உட்கார்த்தி வச்சி, விசிறி விட்டு, நம்ம கையால் காபி போட்டுத் தருவோம்!:)

சுசீலாம்மா-வின் தேன் பாகு குழையும் குரலிலே...அலைமகளே வருக! கொலுவிருக்க வருக!

கேட்டுக் கொண்டே வாசிக்க...

ஆதிலட்சுமி தேவிக்கு அழகாய் விளக்கேற்றி
பஞ்சுத் திரி போட்டு பசும் நெய் தனை ஊற்றி
குங்குமத்தில் பொட்டிட்டு கோல மஞ்சள் தானும் இட்டு
பூமாலை சூட்டி வைத்து பூசிப்போம் உன்னை.....திருமகளே.....

திருவிளக்கை ஏற்றி வைத்தோம் திருமகளே வருக!
குலம் விளங்க எங்கள் வீட்டில் கொலுவிருக்க வருக!
அலைமகளே வருக, ஐச்வர்யம் தருக!
அலைமகளே வருக, ஐச்வர்யம் தருக!
(திருவிளக்கை)

வாசலிலே மாக்கோலம், வீட்டினிலே லட்சுமீகரம்
நெற்றியிலே திருசூர்ணம், நெஞ்சினிலே லட்சுமீகரம்
அம்மா நீ ஆதரித்தால் அகிலமெல்லாம் இன்ப மயம்
அட்டமா சித்தியுடன் லோகமெல்லாம் சேம மயம்
அலைமகளே வருக, ஐச்வர்யம் தருக!!
அலைமகளே வருக, ஐச்வர்யம் தருக!!

மாவிலையும் தோரணமும் மங்கலத்தின் அடையாளம்
ஊதுவத்தி எரிவதினால் உள்ளத்திலும் ஒரு வாசம்
அம்மா நீ அருள் புரிந்தால் அகிலமெல்லாம் அலங்காரம்
அன்றாடம் பாடிடுவோம் அட்டலட்சுமி திருநாமம்!
அன்றாடம் பாடிடுவோம் அட்டலட்சுமி திருநாமம்!

சங்கு சக்ரதாரி நம'ஸ்'காரம்..
சகல வரம் தருவாய் நம'ஸ்'காரம்..
பத்மபீட தேவி நம'ஸ்'காரம்..
பக்தர் தமைக் காப்பாய் நம'ஸ்'காரம்..

திரு அங்க மாலை - 2

2011-09-22T21:43:00.000-04:00

நெஞ்சே நீ நினையாய்
வஞ்சமில்லா நெஞ்சினுக்கு தஞ்சம் அளிப்பவளை
செஞ்சடை யோனுடன் கொஞ்சிக் களிப்பவளை
நானிலமெல்லாம் காக்கும்
நாயகியை நிதமும்
நெஞ்சே நீ நினையாய் (6)

கையே நீ தொழுவாய்
கந்தமலர் தூவிஅவள் கஞ்சமலர்ப் பாதங்களை
விந்தையிலும் விந்தையான எந்தைஇடம் இருப்பவளை
காந்தமெனக் கவர்ந்திழுக்கும்
கன்னியவளை என்றும்
கையே நீ தொழுவாய் (7)

காலே வலம் வாராய்
கடலெனும் வாழ்விதிலே கரையெனவே ஒளிரும்
மடலவிழ்ந் தமலராய் மனதினில் மணத்திருக்கும்
கன்றென நமைக்காக்கும்
கற்பகத்தின் திருக்கோவில்
காலே வலம் வாராய் (8)

உடலே நீ பணியாய்
உம்பருக்கும் இம்பருக்கும் இகபர சுகமளிக்கும்
அங்கமொரு பங்கெனவே அரனுடன் பகிர்ந்திருக்கும்
உலகமெல்லாம் காக்கும்
உமையவளை தினமும்
உடலே நீ பணியாய் (9)

மனமே நீ உணராய்
மங்கை யவள் உறவன்றி உண்மை உற வெதுவுமில்லை
கங்கை முடி சூடியவன் பங்கை யன்றி புகலுமில்லை
அங்கையின் நெல்லிக்கனி
போலஅவள் அருமைதனை
மனமே நீ உணராய் (10)

--கவிநயா

(அடுத்த வாரம்னு சொல்லியிருந்தேன், ஆனா அடுத்த செவ்வாய் நவராத்திரி ஆரம்பிக்கறதால இப்பவே இட்டாச்சு :)

திரு அங்க மாலை - 1

2011-09-19T21:38:00.005-04:00

திருநாவுக்கரசர் அப்பனுக்கு திரு அங்க மாலை பாடினார். அதை படிச்ச போது அம்மாவுக்கு பாடணும்னு எனக்கு ஆசை வந்தது. புலியைப் பார்த்து... அந்தக் கதைதான் இது. இருந்தாலும், அருள் கூர்ந்து பொறுமையுடன் வாசிக்கும்படி வேண்டுகிறேன்.

தலையே நீ வணங்காய்
திருமுடியில் எழில் பிறைமதி சூடிய
கருவிழியில் அருட் கடலினை ஏந்திய
தரணியெல்லாம் காக்கும்
தாயவள் திருப்பாதம்
தலையே நீ வணங்காய் (1)

கண்ணே நீ காணாய்
கருமையில் ஒளிர்பவள் கருணையில் அருள்பவள்
மறுமையை அறுப்பவள் மலரெனச் சிரிப்பவள்
கண்ணெனநமைக் காக்கும்
கண்மணியவள் வடிவம்
கண்ணே நீ காணாய் (2)

செவியே நீ கேளாய்
செய்யக் கலையுடுத்தி செங்கமலம்போ லொளிரும்
பையப் பணிந்தவர்க்கு பரிவுடனே அருளும்
சிந்தையெல்லாம் நிறைந்த
செய்யவள் திருப்புகழை
செவியே நீ கேளாய் (3)

மூக்கே நீ முரலாய்
முந்தைவினை யனைத்தும் முந்திவந்து விரட்டும்
பிள்ளைப்பிழை யனைத்தும் பேரருளால் பொறுக்கும்
முதலுக்கு முதலான
முக்கண்ணி யைப்போற்றி
மூக்கே நீ முரலாய் (4)

நாவே நீ கூறாய்
நஞ்சமு தாக்கிய வஞ்சியவள் புகழை
அஞ்சலென அன்பால் அரவணைக்கும் அழகை
நெஞ்சந்தனில் குடியேறி
நிலைத்தவள் திருநாமம்
நாவே நீ கூறாய் (5)

--கவிநயா

(இன்னும் இருக்கு. அது அடுத்த வாரம்...)

திருவடி சரணம்

2011-09-12T21:06:00.000-04:00

அம்மா உன்திரு வடிசரணம்
அருள்கூர்ந் திங்கே நீவரணும்
மனதின் கவலை நீக்கிடணும்
மாதா நீதான் உதவிடணும்

உன்னடியே தொழுதிடப் பழகிடணும் - உன்
பெயரே நாவில் தவழ்ந்திடணும்
நாளும் உனையே போற்றிடணும் - உன்
பெருமை தனையே பாடிடணும்

உன்சொல் ஒன்றே கேட்டிடணும் - உன்
விருப்பம் போலே வாழ்ந்திடணும்
நீயே கதியென் றுணர்ந்திடணும் - உன்
காலடியில் நான் கிடந்திடணும்

--கவிநயா

எங்கே இருக்கிறாய்?

2011-09-05T20:19:00.001-04:00

சுப்பு தாத்தா கானடா ராகத்தில் பாடியதைக் கேட்டு ரசியுங்கள். நன்றி தாத்தா!

எங்கேதான் இருக்கிறாய்?
எப்படித்தான் இருக்கிறாய்?
துயரத்தில் துவள்பவளை
எப்படித்தான் மறக்கிறாய்?

தொடு வானம் போலேநீ
தொலைவினிலே இருக்கிறாய்
நீரில் தெரியும் நிலவைப் போலே
என்னை அலைக்கழிக்கிறாய்!

வற்றாத விழியிரண்டை
வள்ளல் போலத் தந்துவிட்டாய்
பொற்றாமரை யினின்றும்
எழுந்து வர மறுக்கிறாய்!

இது என்ன நியாயமோ
இதுவே உந்தன் நீதியோ
பெற்ற பிள்ளை அழுதிருக்க
வீணை உனக்குத் தேவையோ?

கன்றை விட்டுப் பிறஉயிரை
கொஞ்சுகின்ற பசுவும் உண்டோ?
என்னை விட்டு சிங்கமதை
விரும்பும் உந்தன் எண்ணம்தான் என்ன?

உன்மாயை ஒன்றும் புரியவில்லை
வாழும் வழியும் தெரியவில்லை
என்று தான் வருவாயோ
என்னைக் கூட்டிச் செல்வதற்கு?

--கவிநயா

உன்னை நானறிவேன்!

2011-08-29T21:04:00.000-04:00

மனமே உன்னை நானறிவேன் - என்
அன்னையை என்றோ நீ அறிவாய்?
உலகிதன் மாயையில் உழலுகிறாய் - உடன்
என்னையும் இழுத்ததில் உழற்றுகிறாய்

(மனமே)

பாடுகள் பலப்பல பட்ட பின்னும்
சூடுகள் பலபெற்று கெட்டபின்னும்
நாடிடுவா யில்லை அவள் புகலே
பாடிடுவா யில்லை அவள் புகழே

(மனமே)

அவளன்றி உறவில்லை அறிந்து கொள்வாய் - அவள்
பதமன்றி புகலில்லை புரிந்து கொள்வாய்
நிலையற்ற இன்பங்கள் துறந்திடுவாய் - அவள்
நினைவன்றி அனைத்தையும் மறந்திடுவாய்!

(மனமே)

--கவிநயா

எத்தனை பிறவிகள் நானெடுத்தாலும்...

2011-08-22T22:36:00.002-04:00

இதோ, சுப்பு தாத்தா அடானா ராகத்தில் மிகப் பொருத்தமாக அமைத்திருக்கிறார்! மிக்க நன்றி தாத்தா!

எத்தனை பிறவிகள்

நானெடுத்தாலும்

இத்தரை மீதினில்

பரிதவித்தாலும்

சித்திரமே உன்னை

நினைந்திட வேணும்

நித்தமும் மலரடி

பணிந்திட வேணும்

உச்சி யிலே கங்கை

சூடி யவன் மங்கை

பிச்சி யென பித்தனுடன்

நர்த்தன மிடும் நங்கை

பச்சை நிற மேனி

இச் சகத்தின் ராணி

மச்ச விழி வேணி

மெச்சிட வரு வாய்நீ!

--கவிநயா

படத்துக்கு நன்றி: http://www.hindudevotionalblog.com/2011/06/chidambaram-temple-festival-2011-aani.html

என்ன ஆச்சு அம்மா?

2011-08-15T21:59:00.001-04:00

சுப்பு தாத்தா அருமையாக புன்னாகவராளி ராகத்தில் பாடியிருப்பதை கேட்டு மகிழுங்கள்... நன்றி தாத்தா!

அம்மா இங்கே வாவா – என
வருந்தி வருந்தி அழைத்தேன்
அன்பு மீற அம்மா நீஎன்
அருகில் வர தவித்தேன்

உனக்கெனவே காத்திருக்கேன் தெரியவில்லையோ? – இல்லை
தெரிந்திருந்தும் இற/ர/ங்கி வர நேரமில்லையோ?
தேவர்களைக் காக்க வேறு யாரும் இல்லையோ? – அந்த
இந்திரனின் தொந்தரவு குறையவில்லையோ?

பரமசிவன் பார்வையிலே உன்னை மறந்தையோ? – இல்லை
பள்ளி கொண்டான் மாயத்திலே உலகை மறந்தையோ?
பழத்திற்கென வந்த சண்டை இன்னும் தொடருதோ? – அந்த
கலவரத்தைத் தீர்ப்பதிலே என்னை மறந்தையோ?

--கவிநயா

ஆடி வெள்ளி: அன்னபூர்ணாஷ்டகம்

2011-08-12T19:45:00.003-04:00

ஆதி சங்கர பகவத்பாதர் இயற்றிய அன்னபூர்ணாஷ்டகம் லலிதாம்மாவின் தமிழாக்கத்தில்...

நித்யானந்தகரி வராபயகரி சௌந்தர்ய ரத்னாகரி
நிர்தூதாகில கோரபாபநகரி ப்ரத்யக்ஷ மாஹேஸ்வரி
ப்ராலேயாச்சலவம்சபாவநகரி காஷீபுராதீச்வரி
பிக்ஷாந்தேஹி க்ருபாவலம்பநகரி மாதான்னபூர்ணேஸ்வரி

பேரின்பமளிப்பவளே!அஞ்சேலென்றருள்பவளே!பேரெழில் பொங்குங்கடலே!
தீவினைகள் யாவையும் போக்கியருள் பொழிந்திடும் கண்கண்ட தெய்வத்தாயே!
பனிமலையோன் குலந்தனை புனிதமாக்கியவளே!காசிநகர் மேவுந்தாயே!
பிச்சையளித்தெனக்கு நீ பேரருள்புரிவாயே!அன்னபூரணீ அன்னையே!

நானாரத்ன விசித்திர பூஷணகரி ஹெமாம்பராடம்பரி
முக்தாஹார விலம்பமான விலசத்வக்ஷோஜா கும்பாந்தரி
காஷ்மீராகருவாசிதாங்கருசிரே காசீபுராதீச்வரி
பிக்ஷாந்தேஹி க்ருபாவலம்பனகரி மாதான்னபூர்ணேஸ்வரி

பலவகை அணிகலன்கள் பூண்டகரத்தாளே!பொன்னாடை தரித்த தாயே!
தாய்மை பொங்கும் மார்பில் முத்துமாலையழகாய் நெளிந்திட மிளிரும் தூயே!
காஷ்மீரதூப மணம் கமழ்ந்திடத் திகழ்பவளே!காசிநகர் மேவுந்தாயே!
பிச்சையளித்தெனக்கு நீ பேரருள்புரிவாயே!அன்னபூரணீ அன்னையே!

யோகானந்தகரி ரிபுக்ஷயகரி தர்மேகநிஷ்டாகரி
சந்த்ரார்காநலபாசமானலஹரி த்ரைலோக்யரக்ஷாகரி
சர்வைஸ்வர்யகரி தபஹ்பலஹரி காசீபுராதீச்வரி
பிக்ஷாந்தேஹி க்ருபாவலம்பநகரி மாதான்னபூர்ணேஸ்வரி

யோகசுகந்தருபவளே!பகைவரைப்பொடிப்பவளே!நன்னெறியில் நிறுத்துந்தாயே!
மதி,பரிதி,தீயொளிக்கு ஒப்பாய் ஒளிர்பவளே!மூவுலகுங்காக்குந்தேவி!
பொருள்வளம் அருள்பவளே!தவப்பயனைத் தருபவளே!காசீநகர் மேவுந்தாயே!
பிச்சையளித்தெனக்கு நீ பேரருள்புரிவாயே !அன்னபூரணீ அன்னையே!

கைலாசாச்சல கந்தராலயகரி கெளரி உமா சங்கரி
கௌமாரி நிகமார்த்த கோசரகரி ஓங்கார பீஜாக்ஷரி
மோக்ஷத்வாரகவாடபாடநகரி காசீபுராதீச்வரி
பிக்ஷாந்தேஹி க்ருபாவலம்பனகரி மாதான்னபூர்ணேஸ்வரி

கயிலாய மலைக்குகையில் அமர்ந்தருள் பொழிந்திடும் கெளரி,உமா,சங்கரி!
என்றென்றும் குமரியே!மறைபொருளுரைப்பவளே!பிரணவத்தின் உண்மையுருவே!
மோக்ஷத்து வாயிலை திறக்குந்தயாபரி!காசீநகர் மேவுந்தாயே!
பிச்சையளித்தெனக்கு நீ பேரருள்புரிவாயே!அன்னபூரணீ அன்னையே!

த்ருஷ்யாத்ருஷ்யவிபூதிவாஹநகரி பிரம்மாண்டபாண்டோதரி
லீலாநாடகசூத்ரகேலநகரி விஞ்ஞானதீபாங்குரி
ஸ்ரீவிச்வேசமனஹ் பிரசாதநகரி காசீபுராதீச்வரி
பிக்ஷாந்தேஹி க்ருபாவலம்பநகரி மாதான்ன பூர்ணேஸ்வரி

மண்ணுலகசுகம் யாவும் மகிழ்ந்தருளும் அன்னையே!பிரம்மாண்டம் தாங்குந்தாயே!
விளையாட்டாய் உலகையே இயக்கிடும் ஈஸ்வரி!விஞ்ஞான தீபச்சுடரே!
மகேசன்மனத்தினை மகிழ்விக்கும் மங்கையே!காசீநகர் மேவுந்தாயே!
பிச்சையளித்தெனக்கு நீ பேரருள்புரிவாயே!அன்னபூரணீ அன்னையே!

ஆதிக்ஷாந்தசமஸ்தவர்ணநகரி சம்போஸ்த்ரிபாவாகரி
காஷ்மீரா த்ருபுரேச்வரி த்ரினயநீ விஷ்வேச்வரீ சர்வரி
ஸ்வர்கத்வாரகவாடபாடநகரி காசீபுராதீச்வரி
பிக்ஷாந்தேஹி க்ருபாவலம்பநகரி மாதான்ன பூர்ணேஸ்வரி

அனைத்தெழுத்தும் அருளிய அன்னையே!அரனின் முத்தொழிலுக்கு ஆதாரமே!
குங்கும நெற்றியளே !மூவுலக நாயகியே!எங்கும் நிறை முக்கண்ணியே!
சுவர்க்கத்தின் வாயிலை திறக்குந்தயாபரி!காசீநகர் மேவுந்தாயே!
பிச்சையளித்தெனக்கு நீ பேரருள்புரிவாயே!அன்னபூரணீ அன்னையே!

உர்வீசர்வஜநேச்வரி ஜயகரி மாதா க்ருபாசாகரி
வேணிநீலசமானகுந்தலதரி நித்யான்னதாநேச்வரி
சாக்ஷான்மோக்ஷகரி சதா சுபகரி காசீபுராதீச்வரி
பிக்ஷாந்தேஹி க்ருபாவலம்பநகரி மாதான்னபூர்ணேஸ்வரி

உலகாளும் உத்தமியே!வெற்றிதரும் உமையாளே!தாயன்பு தளும்புங்கடலே!
பின்னிய கார்குழலாளே!எந்நேரமும் உணவு அளித்துயிர் காக்குந்தாயே!
முக்தியளிப்பவளே!நலந்தரும் நாயகியே!காசீநகர் மேவுந்தாயே!
பிச்சையளித்தெனக்கு நீ பேரருள்புரிவாயே!அன்னபூரணி அன்னையே!

தேவி சர்வவிசித்ர ரத்னரசிதா தாக்ஷாயணீ சுந்தரி
வாமாச்வாதுபயோதரா ப்ரியகரி சௌபாக்ய மாஹெச்வரி
பக்தாபீஷ்டகரி சதாசுபகரி காசீபுராதீச்வரி
பிக்ஷாந்தேஹி க்ருபாவலம்பநகரி மாதான்ன பூர்ணேஸ்வரி

அரிய ஆபரணங்கள் அணிந்த என் அன்னையே!தக்ஷன் பெற்ற பேரழகியே!
பரமனில் பாதியே!பேரெழில் ஜோதியே!குணக்குன்றே!குலவிளக்கே!
அடியார்க்கருள்பவளே!நலந்தரும் நாயகியே!காசீநகர் மேவுந்தாயே!
பிச்சையளித்தெனக்கு நீ பேரருள் புரிவாயே!அன்னபூரணி அன்னையே!

சந்த்ரார்காநலகோடிகோடிசத்ருஷி சந்த்ரான்ஷுபிம்பாதரி
சந்த்ரார்காக்னிசமானகுண்டலதரி சந்த்ரார்கவர்னேஸ்வரி
மாலாபுஸ்தக பாஷசாங்குசதரி காசீபுராதீச்வரி
பிக்ஷாந்தேஹி க்ருபாவலம்பநகரி மாதான்னபூர்ணேஸ்வரி

பலகோடி பரிதி,மதி,தீபோல ஒளிர்பவளே!கொவ்வையோ உன்னிதழ்களே?
பானு,மதி போல மின்னும் குண்டலச்செவியாளே!ஈடிணையற்ற எழிலே!
மாலையுடன் புத்தகம்,பாசாங்குசமேந்தி காசிநகர் மேவுந்தாயே!
பிச்சையளித்தெனக்கு நீ பேரருள் புரிவாயே!அன்னபூரணி அன்னையே!

க்ஷத்ரத்ராணகரி மகாபயகரி மாதா க்ருபாசாகரி
சர்வானந்தகரி சதா சிவகரி விச்வேச்வரி ஸ்ரீதரி
தக்ஷாக்ரந்தகரி நிராமயகரி காசீபுராதீச்வரி
பிக்ஷாந்தேஹி க்ருபாவலம்பநகரி மாதான்னபூர்ணேஸ்வரி

ஆதரவு அற்றோர்க்கு அடைக்கலம் அளித்திடும் அன்னையே!அன்புக்கடலே!
யாவர்க்குமின்பமீந்து நலங்காக்கும் நாயகியே!வளவாழ்வு அருளுந்தாயே!
தக்ஷன்திமிர் தணித்தவளே! துயர் தீர்க்கும் அருமருந்தே! காசீநகர் மேவுந்தாயே!
பிச்சையளித்தெனக்கு நீ பேரருள் புரிவாயே!அன்னபூரணி அன்னையே!

அன்னபூர்ணே சதாபூர்ணே சங்கரப் பிராணவல்லபே
ஞானவைராக்யசித்யர்த்தம் பிக்ஷாந் தேஹி ச பார்வதி

உணவூட்டும் அன்னையே! உமையே!பேருண்மையே!
நஞ்சுண்டான் உள்ளத்துயிரே!
பிச்சையாய் ஞானமும்,பற்றற்றமனமும் தா!
இமவானின் இனிய மகளே!

மாத ச பார்வதிதேவி பிதா தேவோ மகேஸ்வரஹ
பாந்தவா:ஷிவபக்தாஸ்ச ச்வதேஷோ புவனத்ரயம்

மலைமகளே எந்தன் அன்னை;மகேசனே எந்தன் தந்தை;
அரனடியாரே எனக்குற்றார்;மூவுலகும் என் தாய்நாடு!

ஆ.வெ.4: தாமரைப் பூவில் அமர்ந்தவளே!

2011-08-11T20:38:00.007-04:00

அனைவருக்கும் இனிய வரலக்ஷ்மி விரதத் திருநாள் வாழ்த்துகள்!

பி.சுசீலாம்மா பாடிய பிரபலமான இந்தப் பாடல், உங்களுக்காக...

தாமரைப் பூவில் அமர்ந்தவளே
செந்தூரத் திலகம் அணிந்தவளே
(செந் தாமரைப் பூவில்)

சிந்தையில் நின்றாடும் நாரணன் ச்நெஞ்சினில்
நிறைந்தவளே கருணையில் சிறந்தவளே
(செந் தாமரைப் பூவில்)

சுந்தரி பார்வதி பாமகளும்
சொந்தமுடன் நினைக்கும் பூமகளே
உன்பதம் எந்நாளும் தஞ்சம் திருமகளே
அன்பர்களைக் காத்திடும் அலைமகளே
(செந் தாமரைப் பூவில்)

அலைகடலில் உதித்த ஆதிலக்ஷ்மி தாயே
அமரர்கள் துதி பாடும் அமுதமும் நீயே
செல்வங்கள் பெருகும் உந்தன் திருவருள் துணையாலே
உலகமேல்லாம் உயரும் உன்னருள் மனத்தாலே
(தாமரைப் பூவில்)

**

அலை போல அலைகின்றேன்

2011-08-08T20:30:00.000-04:00

அலை போல அலை கின்றேன் அம்மா
அலை போல அலை கின்றேன் அம்மா

கடல் போன்ற வாழ்விதிலே
கரை காணா மலே எங்கும்

அலை போல அலை கின்றேன் அம்மா

(அலை)

சிலை போல ஏன் நின்றாய் அம்மா?
சிலை போல ஏன் நின்றாய் அம்மா?

என் நிலை கண்டும் இரங்காமல்
மலை போல அசையாமல்

சிலை போல ஏன் நின்றாய் அம்மா?

(அலை)

மனக் குகைக்குள் நீயே கதிரென வர வேண்டும்
ஒளிக் குவையே நீயே ஒளியினைத் தர வேண்டும்
மலர்க் கொடியே உன்றன் மடியினில் விழ வேண்டும்
மனக் குறைகள் தீர மனம் விட்டு அழ வேண்டும்

(அலை)

--கவிநயா

ஆ.வெ.3: ஸ்ரீ மீனாக்ஷி போற்றி

2011-08-04T22:24:00.004-04:00

ஓம் அங்கயற்கண் அம்மையே போற்றி 1
ஓம் அகிலாண்ட நாயகியே போற்றி
ஓம் அருமறையின் வரம்பே போற்றி
ஓம் அறம் வளர்க்கும் அம்மையே பொற்றி
ஓம் அரசிளங் குமரியே போற்றி
ஓம் அப்பர் பிணி மருந்தே போற்றி
ஓம் அமுத நாயகியே போற்றி
ஓம் அருந்தவ நாயகியே போற்றி
ஓம் அருள் நிறை அம்மையே போற்றி
ஓம் ஆல்வாய்க் கரசியே போற்றி 10
ஓம் ஆறுமுகத்தின் அன்னையே போற்றி
ஓம் ஆதியின் பாதியே போற்றி
ஓம் ஆலால சுந்தரியே போற்றி
ஓம் ஆனந்த வல்லியே போற்றி
ஓம் இளவஞ்சிக் கொடியே போற்றி
ஓம் இமயத் தரசியே போற்றி
ஓம் இடபத்தோன் துணையே போற்றி
ஓம் ஈஸ்வரியே போற்றி
ஓம் உயிர் ஓவியமே போற்றி
ஓம் உலகம்மையே போற்றி 20
ஓம் ஊழ்வினை தீர்ப்பாய் போற்றி
ஓம் எண்திசையும் வென்றோய் போற்றி
ஓம் ஏகன் துணையே போற்றி
ஓம் ஐங்கரன் அன்னையே போற்றி
ஓம் ஐயம் தீர்ப்பாய் போற்றி
ஓம் ஒப்பிலா அமுதே போற்றி
ஓம் ஓங்கார சுந்தரியே போற்றி
ஓம் கற்றோர்க் கினியோய் போற்றி
ஓம் கல்லார்க்கும் எளியோய் போற்றி
ஓம் கடம்பவன சுந்தரியே போற்றி 30
ஓம் கல்யாண சுந்தரியே போற்றி
ஓம் கனகமணிக் குன்றே போற்றி
ஓம் கற்பின் அரசியே போற்றி
ஓம் கருணை ஊற்றே போற்றி
ஓம் கல்விக்கு வித்தே போற்றி
ஓம் கனகாம்பிகையே போற்றி
ஓம் கதிரொளிச் சுடரே போற்றி
ஓம் கற்பனை கடந்த கற்பகமே போற்றி
ஓம் காட்சிக் கினியோய் போற்றி
ஓம் காலம் வென்ற கற்பகமே போற்றி 40
ஓம் கிளியெந்திய கரத்தோய் போற்றி
ஓம் குலச்சிறை காத்தோய் போற்றி
ஓம் குற்றம் பொறுக்கும் குணமே போற்றி
ஓம் கூடற் கலாப மயிலே போற்றி
ஓம் கோலப் பசுங்கிளியே போற்றி
ஓம் சம்பந்தன் ஞானத்தாயே போற்றி
ஓம் சக்தி வடிவே போற்றி
ஓம் சங்கம் வளர்த்தாய் போற்றி
ஓம் சிவகாம சுந்தரியே போற்றி
ஓம் சித்தம் தெளிவிப்பாய் போற்றி 50
ஓம் சிவயோக நாயகியே போற்றி
ஓம் சிவானந்த வல்லியே போற்றி
ஓம் சிங்கார வல்லியே போற்றி
ஓம் செந்தமிழ்த் தாயே போற்றி
ஓம் செல்வத்துக் கரசியே போற்றி
ஓம் சேனைத் தலைவியே போற்றி
ஓம் சொக்கர் நாயகியே போற்றி
ஓம் சைவநெறி நிலைக்கச் செய்தாய் போற்றி
ஓம் ஞானாம்பிகையே போற்றி
ஓம் ஞானப் பூங்கோதையே போற்றி 60
ஓம் தமிழர் குலச் சுடரே போற்றி
ஓம் தண்டமிழ்த் தாயே போற்றி
ஓம் திருவுடை யம்மையே போற்றி
ஓம் திசையெலாம் புரந்தாய் போற்றி
ஓம் திரிபுரசுந்தரியே போற்றி
ஓம் திருநிலை நாயகியே போற்றி
ஓம் தீந்தமிழ்ச் சுவையே போற்றி
ஓம் தெவிட்டாத தெள்ளமுதே போற்றி
ஓம் தென்னவன் செல்வியே போற்றி
ஓம் தேன்மொழி யம்மையே போற்றி 70
ஓம் தையல் நாயகியே போற்றி
ஓம் நற்கனியின் சுவையே போற்றி
ஓம் நற்றவத்தின் கொழுந்தே போற்றி
ஓம் நல்ல நாயகியே போற்றி
ஓம் நீலாம்பிகையே போற்றி
ஓம் நீதிக்கரசியே போற்றி
ஓம் பக்தர்தம் திலகமே போற்றி
ஓம் பழமறையின் குருந்தே போற்றி
ஓம் பரமானந்தப் பெருக்கே போற்றி
ஓம் பண்ணமைந்த சொல்லே போற்றி 80
ஓம் பவள வாய்க் கிளியே போற்றி
ஓம் பல்லுயிரின் தாயே போற்றி
ஓம் பசுபதி நாயகியே போற்றி
ஓம் பாகம்பிரியா அம்மையே போற்றி
ஓம் பாண்டி மாதேவியின் தேவே போற்றி
ஓம் பார்வதி அம்மையே போற்றி
ஓம் பிறவிப் பிணி தீர்ப்பாய் போற்றி
ஓம் பெரிய நாயகியே போற்றி
ஓம் பொன் மயிலம்மையே போற்றி
ஓம் பொற்கொடி அன்னையே போற்றி 90
ஓம் மலயத்துவசன் மகளே போற்றி
ஓம் மங்கல நாயகியே போற்றி
ஓம் மழலைக் கிளியே போற்றி
ஓம் மனோன்மணித் தாயே போற்றி
ஓம் மண்சுமந்தோன் மாணிக்கமே போற்றி
ஓம் மாயோன் தங்கையே போற்றி
ஓம் மாணிக்க வல்லியே போற்றி
ஓம் மீனவர் கோன் மகளே போற்றி
ஓம் மீனாக்ஷி அம்மையே போற்றி
ஓம் முழுஞானப் பெருக்கே போற்றி 100
ஓம் முக்கண் சுடர் விருந்தே போற்றி
ஓம் யாழ் மொழி யம்மையே போற்றி
ஓம் வடிவழ கம்மையே போற்றி
ஓம் வேலனுக்கு வேல் தந்தோய் போற்றி
ஓம் வேத நாயகியே போற்றி
ஓம் வையகம் வாழ்விப்பாய் போற்றி
ஓம் அம்மையே அம்பிகையே போற்றி போற்றி
ஓம் அங்கயற்கண் அம்மையே போற்றி போற்றி 108

***

காரணம் என்னம்மா?

2011-08-01T20:35:00.003-04:00

வானே சதமென்று வான்பார்த்த நிலம்போல
நீயே சதமென்று உனைப்பார்த்து வாழ்கின்றேன்
கருணை முகிலேஎன் கண்ணின் மணிநீயே
வருணன் போலன்பை வருஷித் தருள்வாயே!

அல்லல் படும்உன்றன் பிள்ளையைப் பாராயோ?
மின்னல் பார்வையொன்றை என்திசை வீசாயோ?
அம்மா உன்பிள்ளை தன்வினையால் படும்பாட்டை
சும்மாஒருநொடியில் உன்னால் தீர்த்தலும் ஆகாதோ?

கல்லோ உன்னுள்ளம் எனும்ஐயம் எனக்கில்லை
கனியே உன்னுள்ளம் என்பதை நானறிவேன்
துன்பப் புடம்போட்டு எனைத்தங்கம் ஆக்குதற்கோ,
அம்மா இன்னும்நீ சும்மா இருக்கின்றாய்?

--கவிநயா

ஆ.வெ.2: மஹாலக்ஷ்மி அஷ்டோத்ரம்

2011-07-29T11:27:00.012-04:00

இங்கே கேட்கலாம்...

ஒவ்வொரு நாமாவின் ஆரம்பத்தில் 'ஓம்' மற்றும் இறுதியில் 'நம:' சேர்த்துக் கொள்ளவும்.

ஓம் ப்ரக்ருத்யை நம:
விக்ருத்யை
வித்யாயை
ஸர்வபூத-ஹிதப்ரதாயை
ச்ரத்தாயை
விபூத்யை
ஸ¤ரப்யை
பரமாத்மிகாயை
வாசே
பத்மாலயாயை
பத்மாயை
சுசயே
ஸ்வாஹாயை
ஸ்வதாயை
ஸுதாயை
தன்யாயை
ஹிரண்மய்யை
லக்ஷ்ம்யை
நித்யபுஷ்டாயை
விபாவர்யை
அதித்யை
தித்யை
தீப்தாயை
வஸுதாயை
வஸுதாரிண்யை
கமலாயை
காந்தாயை
காமாக்ஷ்யை
க்ஷீரோதஸம்பவாயை
அனுக்ரஹ ப்ரதாயை
புத்தயே
அநகாயை
ஹரிவல்லபாயை
அசோகாயை
அம்ருதாயை
தீப்தாயை
லோகசோக-விநாசின்யை
தர்மநிலயாயை
கருணாயை
லோகமாத்ரே
பத்மப்ரியாயை
பத்மஹஸ்தாயை
பத்மாக்ஷ்யை
பத்மஸுந்தர்யை
பத்மோத்பவாயை
பத்மமுக்யை
பத்மநாபப்ரியாயை
ரமாயை
பத்மமாலாதராயை
தேவ்யை
பத்மின்யை
பத்மகந்தின்யை
புண்யகந்தாயை
ஸுப்ரஸன்னாயை
ப்ரஸாதாபிமுக்யை
ப்ரபாயை
சந்த்ரவதனாயை
சந்த்ராயை
சந்த்ரஸஹோதர்யை
சதுர்ப்புஜாயை
சந்த்ரரூபாயை
இந்திராயை
இந்து-சீதலாயை
ஆஹ்லாதஜனன்யை
புஷ்ட்யை
சிவாயை
சிவகர்யை
ஸத்யை
விமலாயை
விச்வஜனன்யை
துஷ்ட்யை
தாரித்ர்ய-நாசின்யை
ப்ரீதிபுஷ்கரிண்யை
சாந்தாயை
சுக்லமால்யாம்பராயை
ச்ரியை
பாஸ்கர்யை
பில்வநிலயாயை
வராரோஹாயை
யசஸ்வின்யை
வஸுந்த்ராயை
உதாராங்காயை
ஹரிண்யை
ஹேமமாலின்யை
தனதானயகர்யை
ஸித்தயே
ஸ்த்ரைணஸெளம்யாயை
சுபப்ரதாயை
ந்ருபமேச்மகதானந்தாயை
வரலக்ஷ்ம்யை
வஸுப்ரதாயை
சுபாயை
ஹிரண்யப்ராகாராயை
ஸமுத்ரதனயாயை
ஜயாயை
மங்களாயை
தேவ்யை
விஷ்ணுவக்ஷஸ்தல-ஸ்திதாயை
விஷ்ணுபதன்யை
ப்ரஸன்னாக்ஷ்யை
நாராயணஸமாச்ரிதாயை
தாரித்ர்யத்வமஸின்யை
தேவ்யை
ஸர்வோபத்ரவவாரிண்யை
நவதுர்க்காயை
மஹாகாள்யை
ப்ரஹ்மவிஷ்ணு - சிவாத்மி காயை
த்ரிகாலஜ்ஞானஸம்பன்னாயை
புவனேச்வர்யை

அன்புடன்
கவிநயா

படத்துக்கு நன்றி: http://shrimatasharan.blogspot.com/2010/11/sri-lakshmi-puja.html

***

இந்த அட்டோத்திரத்தின் மொழிப்பெயர்ப்பு:

ஓம் இயற்கையே போற்றி!
ஓம் பலவடிவானவளே போற்றி!
ஓம் கல்வியே போற்றி!
ஓம் அனைத்துயிர்க்கும் அருள்பவளே போற்றி!
ஓம் இசைக்கப்படுபவளே போற்றி!

ஓம் செல்வமே போற்றி!
ஓம் விண்ணவளே போற்றி!
ஓம் உள்ளுறைபவளே போற்றி!
ஓம் சொல்லே போற்றி!
ஓம் தாமரைக் கோவிலே போற்றி!

ஓம் தாமரையே போற்றி!
ஓம் தூய்மையே போற்றி!
ஓம் மங்கலமே போற்றி!
ஓம் அமங்கலத்தைத் தீர்ப்பவளே போற்றி!
ஓம் அமுத ஊற்றே போற்றி!

ஓம் நன்றியே போற்றி!
ஓம் பொன்வடிவானவளே போற்றி!
ஓம் இலக்குமியே போற்றி!
ஓம் என்றும் வலிமை அருள்பவளே போற்றி!
ஓம் ஒளியே போற்றி!

ஓம் அளவில்லாதவளே போற்றி!
ஓம் வேண்டுதல் அருள்பவளே போற்றி!
ஓம் கனலே போற்றி!
ஓம் உலகமே போற்றி!
ஓம் உலகைக் காப்பவளே போற்றி!

ஓம் தாமரையே போற்றி!
ஓம் கவர்பவளே போற்றி!
ஓம் காதற்கண்ணியே போற்றி!
ஓம் பாற்கடலில் உதித்தவளே போற்றி!
ஓம் அருளை அள்ளித் தருபவளே போற்றி!

ஓம் அறிவே போற்றி!
ஓம் குற்றமில்லாதவளே போற்றி!
ஓம் விண்ணவன் துணைவியே போற்றி!
ஓம் சோகமற்றவளே போற்றி!
ஓம் அழிவற்றவளே போற்றி!

ஓம் சுடரே போற்றி!
ஓம் உலகக் கவலைகள் தீர்ப்பவளே போற்றி!
ஓம் அறத்தில் நிலைத்தவளே போற்றி!
ஓம் அருளே போற்றி!
ஓம் உலக அன்னையே போற்றி!

ஓம் தாமரையை விரும்புபவளே போற்றி!
ஓம் தாமரை ஏந்தியவளே போற்றி!
ஓம் தாமரைக்கண்ணியே போற்றி!
ஓம் தாமரை அழகியே போற்றி!
ஓம் தாமரையில் தோன்றுபவளே போற்றி!

ஓம் தாமரை முகத்தவளே போற்றி!
ஓம் பத்மநாபன் துணைவியே போற்றி!
ஓம் மகிழ்ச்சியே போற்றி!
ஓம் தாமரை மாலை அணிந்தவளே போற்றி!
ஓம் தேவியே போற்றி!

ஓம் தாமரைத் திருவே போற்றி!
ஓம் தாமரை மணமே போற்றி!
ஓம் புனித மணமே போற்றி!
ஓம் எளிதில் மகிழ்பவளே போற்றி!
ஓம் அருள்வதில் மகிழ்பவளே போற்றி!

ஓம் ஒளிவட்டமே போற்றி!
ஓம் மதிமுகமே போற்றி!
ஓம் மதியே போற்றி!
ஓம் மதியின் உடன்பிறப்பே போற்றி!
ஓம் நால்கரத்தாளே போற்றி!

ஓம் மதிவடிவானவளே போற்றி!
ஓம் நீலத்தாமரையே போற்றி!
ஓம் மதியின் குளிர்ச்சியே போற்றி!
ஓம் பேரின்பப் பெருக்கே போற்றி!
ஓம் உடல் நலமே போற்றி!

ஓம் மங்கலமே போற்றி!
ஓம் மங்கலம் அருள்பவளே போற்றி!
ஓம் உண்மையே போற்றி!
ஓம் குறையில்லாதவளே போற்றி!
ஓம் அனைத்திற்கும் அன்னையே போற்றி!

ஓம் நல வடிவே போற்றி!
ஓம் வறுமையைப் போக்குபவளே போற்றி!
ஓம் அன்பு ஏரியே போற்றி!
ஓம் அமைதியே போற்றி!
ஓம் வெண்ணிற மாலையும் ஆடையும் உடுத்தியவளே போற்றி!

ஓம் ஒளியைத் தருபவளே போற்றி!
ஓம் வில்வத்தில் உறைபவளே போற்றி!
ஓம் வரங்களை அருள்பவளே போற்றி!
ஓம் புகழே போற்றி!
ஓம் இயற்கைச் செல்வங்களைத் தாங்குபவளே போற்றி!

ஓம் ஒப்பற்ற அழகே போற்றி!
ஓம் மான் ஒத்தவளே போற்றி!
ஓம் பொன்னணியாளே போற்றி!
ஓம் பொன்னையும் உணவையும் தருபவளே போற்றி!
ஓம் பயனே போற்றி!

ஓம் பெண்களுக்கு அருள்பவளே போற்றி!
ஓம் சுபம் அருள்பவளே போற்றி!
ஓம் அரண்மனைகளில் நிலைத்தவளே போற்றி!
ஓம் வரலட்சுமியே போற்றி!
ஓம் செல்வங்கள் தருபவளே போற்றி!

ஓம் சுபமே போற்றி!
ஓம் பொன்னால் சூழப்பட்டவளே போற்றி!
ஓம் அலைமகளே போற்றி!
ஓம் வெற்றியே போற்றி!
ஓம் மங்கலமே போற்றி!

ஓம் தேவியே போற்றி!
ஓம் மாலவன் மார்பில் நிலைத்தவளே போற்றி!
ஓம் மாதவன் துணையே போற்றி!
ஓம் மகிழ்ச்சி பொங்கும் கண்களை உடையவளே போற்றி!
ஓம் நாரணனுடன் அடைக்கலமாக அடையப்படுபவளே போற்றி!

ஓம் வறுமையை துவைப்பவளே போற்றி!
ஓம் தேவியே போற்றி!
ஓம் அனைத்து இடைஞ்சல்களையும் நீக்குபவளே போற்றி!
ஓம் நவதுர்க்கையே போற்றி!
ஓம் மகாகாளியே போற்றி!

ஓம் பிரமன் விண்ணவன் சிவன் வடிவானவளே போற்றி!
ஓம் முக்காலமும் அறிந்தவளே போற்றி!
ஓம் உலகை ஆளும் அன்னையே போற்றி!

ஆடியிலே கூழு வச்சு...

2011-07-25T22:28:00.005-04:00

ஆடியிலே கூழு வச்சு
ஆத்தா ஒனக்காகத் தந்தோம்
ஓடிவந்து எங்களுக்கு கண்ணாத்தா – நீயும்
ஒதவி செய்ய வேணுமடி பொன்னாத்தா!

மஞ்ச குளிச்சுப் புட்டு
மங்கலமா பொட்டு வச்சு
மாவிளக்கு எடுத்து வந்தோம் கண்ணாத்தா – நீயும்
மனசு வக்க வேணுமடி பொன்னாத்தா!

அச்சுவெல்லந் தட்டிப் போட்டு
பச்சரிசி பொங்க வச்சு
பக்குவமா எடுத்து வந்தோம் கண்ணாத்தா – நீயும்
பரிவு காட்ட வேணுமடி பொன்னாத்தா!

தாயே உன் காலடியே
தஞ்சமின்னு ஓடி வந்தோம்
தயங்காம எங்களுக்கு கண்ணாத்தா – நீயும்
தயவு செய்ய வேணுமடி பொன்னாத்தா!

--கவிநயா

('செல்லாத்தா' பாடலின் பாதிப்பு :)

படத்துக்கு நன்றி: http://shakthinesaa.blogspot.com/2011/07/blog-post.html

ஆ.வெ.1: படவேடு! - செல்லாத்தா!

2011-07-22T03:23:00.013-04:00

ஆடி வெள்ளியில் ஆடி வரும், அழகி...
எங்கூருக்கு அண்மையில் உள்ள...படவேடு மாரியம்மன் = ரேணுகாம்பாள்!
குங்குமமே தராத அம்மன் கோயில்-ன்னா, இது மட்டுமே!

தொண்டை மண்டல அம்மன் கோயில்களில் படவேடு மிகவும் புகழ் பெற்றது!
ஆர்க்காடு-ஆரணி சாலையில் உள்ளது!
பெங்களூரில் இருந்து பள்ளிகொண்டா-வாழியூர் வழியாக வரலாம்; வேலூரில் இருந்து சந்தவாசல் வழியாகவும் வரலாம்!

சம்புவராயர் காலம் தொட்டு, பல நூற்றாண்டுப் பழமை வாய்ந்த கோயில் சூழ இருக்கும் ஆலயம்!
இந்த ஆலயங்கள் ஆற்று மணலில் புதையுண்டு போக, அதை மீட்டெடுத்து, TVS அறக்கட்டளை பேணி வருகிறது!

சுற்றிலும் வாழைத் தோப்பும் வயல்களும் மலைகளும் சூழ...
அம்மன்=ரேணுகை!
பரசுராமனின் தாய்!
மூலவரான அம்மன், முகம் மட்டுமே தரையில் ஊன்றியவள்!

அவளுக்குப் பின்னே, அத்தி மரத்தால் செய்த அம்மனின் முழுத் திருவுருவம்! ஆதிசங்கரர் நிறுவிய பாணலிங்கம் மற்றும் நானாகர்ஷணச் சக்கரமும் அருகில்!
இங்கு குங்குமப் பிரசாதம் கிடையாது!
ஆற்றோரமாய், ஜமதக்னி முனிவரின் யாக குண்டம் எனப்படும் திட்டிலிருந்து, ஆண்டுக்கு ஒருமுறை எடுக்கப்படும் மண்"நீறு" மட்டுமே தருவது வழக்கம்!

ஜமதக்னி முனிவர்-ரேணுகாம்பாள் கதை பலரும் அறிந்த ஒன்றே!

தேவியின் அம்சமான ரேணுகை, தனது போர் வீரர்களுடன் யாத்திரை சுற்றி வர, சிவபெருமானின் அம்சமான ஜமதக்னி தங்கி இருக்கும் இடத்தில் வந்து சேர்கிறார்!
இரு கூட்டத்தாருக்கும் இடையே சண்டை மூள, தேவி நெருப்பினை ஏவ, முனிவர் கமண்டல நதியால் அதைக் குளிர்வித்து, பின்னர் அவளை மணமும் புரிந்து கொள்கிறார்!

இவர்களுக்குப் பிறந்தவனே பரசுராமன்!

ஒரு நாள்.....
ரேணுகை, ஆற்றிலே நீர் முகக்கும் போது, கந்தர்வனின் நிழல் கண்டு சற்றே சலனப்பட...
கற்பெனப் படுவது பிறன் "நெஞ்சு புகாமையோ"?.....
அப்படிப் பார்த்தால் யார் தான் கற்புள்ளவர்கள்? முருகா :((

ஜமதக்னி, அவள் "சலனம்" கண்டு சலனப்பட்டார்....
அவளை ஒதுக்குகிறார்!
மகன் பரசுராமனை ஏவி, அவளைக் கொல்லவும் சொல்லி ஆணையிடுகிறார்!
முனியின் சீற்றம் கண்டு, வேறு வழியே இன்றி, அவனும் தாயைத் துணித்து, தன் ஒரு கையையும் துணித்துக் கொள்கிறான்!

ஒரு சலனத்துக்கு, இத்தனை தொடர் சலனங்கள் தேவையா?
பரசுராமன் அழ.....சிவ சொரூபமான முனிவர் வருந்தி, ரேணுகையை உயிர்பித்துத் தரும் நீரைக் கமண்டலத்தில் தர,
பரசுராமனோ படபடப்பில், தாயின் தலையை, காட்டில் வேறொரு குயவப் பெண்ணின் உடலோடு பொருத்தி விடுகிறான்! புதிய ரேணுகை, எழுகிறாள்!

இந்த நிகழ்வுகளுக்குப் பின் முனிவர் மிகவும் ஒடுங்கிப் போய், தவம் இயற்றத் தொடங்க, வேறு ஒன்று சூழ்கிறது!
ஆசிரமத்தின் காமதேனுப் பசுவுக்கு ஆசைப்பட்டு, கார்த்தவீர்ய மன்னன் அவரைத் தவநிலையில் கொன்று விடுகிறான்!

சேதி அறிந்த பரசுராமன், அவனையும், அவன் தோன்றல்களையும், ஆணவம் பிடித்த அரசர்களையும் பூண்டோடு வீழ்த்த பெருங் கோலங் கொள்கிறான்!

முனிவரின் உடலை எரித்த நெருப்பிலே, ரேணுகையும் வீழ...
அப்போது பெய்த மழையால், அவள் மேல் தீக்காயங்கள் பரவின! வேப்பிலை போர்த்தியபடி எரியிலிருந்து எழ, ஈசன் அவளுக்கு அருள்கிறான்!
ஜமதக்னியும், ரேணுகையும் மேலுலகம் செல்லவிட்டு நிற்க....,

அவளோ, அவள் பட்ட மனத் துயரங்களின் நினைவாக, தலை உருவத்தை வழிபாட்டுக்குத் தந்து போகிறாள்!

எந்தத் தலை சலனப்பட்டதோ....அதே தலைக்கு வழிபாடு!
எந்தத் தலையைத் தண்டிக்கத் துணிந்தார்களோ....அதே தலைக்கு வழிபாடு!
கற்பெனப் படுவது....பிறன் நெஞ்சு புகாமையோ?
கற்பெனப் படுவது....இரு நெஞ்சங்களும் ஒருவரை ஒருவர் அறிவதே!

படவேடு ஆலயம் வயல்கள் சூழ, மலையின் கீழ் அமைந்துள்ளது!
விழாக் காலங்களில் கூட்டமும் நிறைய! ஆடியும், நவராத்திரியும் சிறப்பு விழாக்கள்! மற்றபடி, பெரிய வசதியுள்ள ஊர் கிடையாது!
சுற்றிலும் கிராமங்களே! அம்மன் கோயில் மட்டுமில்லாம, எல்லாக் கோயிலுக்கும் போகணும்-ன்னா, சாப்பாட்டுக்கு முன்னமேயே சொல்லிக்கிறது நல்லது! வெயிலில், பசி வயிற்றைக் கிள்ளும்!:)

மலை மேல் உள்ள முருகன் ஆலயமும், வேல் ஆலயமும் எனக்கு ரொம்பப் பிடிக்கும்! மிகவும் வித்தியாசமான முருகன்!
மயில் மேல் உட்காராமல், உய்ய்யரமாய்...."நின்று" கொண்டிருப்பான்!
ஏறு மயில் ஏறி, நெட்டைக் கொக்காய் நிற்கும் முகம் ஒன்றே! - டேய் நெட்டைக் கொக்கு முருகா - Stand up on the bench:)

இந்தக் கிராமச் சுழலும், இவனும்....சின்ன வயசில் முதன் முதலாகப் பார்த்த போது பறி கொடுத்தது-ன்னு நினைக்கிறேன்! அப்போ ரொம்ப சின்ன வயசு!
இவன் பொம்மையைக் கட்டிப் பிடிச்சிக்கிட்டுத் தூங்கும் பழக்கம்....வாழைப் பந்தல் கிராமத்தில் என்னைப் பலரும் கேலி:)

முருகன்-ன்னா, தெய்வம்-ன்னே ஒரு உணர்வு வராம, என்னவன்-என்னவன்-ன்னு இப்படித் தான் ஆகிப் போனதோ? தெரியல!
பெருமாள்-ன்னாத் தான் தெய்வம், ஆலயத்தில் தமிழ் ஏற்றம், சாதி மறுப்பு, இராமானுசர்-ன்னு ஆகிப் போனது!

ஆலயத்துக்கு அருகிலேயே ஒரு வித்தியாசமான இராமன் கோயில்! அனுமன் கையில் ஏட்டுடன் படித்த படி முன்னே இருக்க...
இராமன் தியான கோலத்தில் உட்கார்ந்த வண்ணம், சீதை-இலக்குவன் அருகிருக்கும் காட்சி!
மயில் ராவணனின் மாயங்களை அடக்க முடியாமல் தவித்த போது, அனுமன் தேவியை வேண்டும் காட்சி! அதுவே படவேடு ஆலயத்துக்கு அருகில் அமைந்து விட்டது!

அழகான வயல்கள்! அழகான மலைகள்! அழகிய கிராமங்கள்!
சம்புவராயர் காலக் கல்வெட்டுகள்!
கைலாசப் பாறை, ஜலகம் பாறை, ஜவ்வாது மலை சூழ இருக்கும் காட்சி!
படவேட்டுக்கு ஒரு முறை அவசியம் சென்று வாருங்கள்! பெங்களுர்-சென்னை நெடுஞ்சாலை இன்னும் எளிது!

இன்றைய ஆடி வெள்ளிப் பாடல்...அனைவரும் அறிந்த...செல்லாத்தா!
குரல்: எல்.ஆர்.ஈஸ்வரி
ஆல்பம்: தாயே கருமாரி

செல்லாத்தா செல்ல மாரியாத்தா
எங்கள் சிந்தையில் வந்து அரை வினாடி நில்லாத்தா
கண்ணாத்தா உன்னைக் காணாட்டா
இந்த கண்களிருந்து என்ன புண்ணியம் சொல்லாத்தா
உந்தன் பெருமையை இந்த உலகுக்கு எடுத்து பாடாட்டா
இந்த ஜென்மமெடுத்து என்ன பயனென்று சொல்லடி நீயாத்தா
(செல்லாத்தா)

தென்னமரத் தோப்பினிலே தேங்காயப் பறிச்சிகிட்டு
தேடி வந்தோம் உந்தனையே சின்னாத்தா
நீ இளநீரை எடுத்துகிட்டு எங்க குறை கேட்டுபுட்டு
வளமான வாழ்வு கொடு மாரியாத்தா - நல்ல
வழி தன்னையே காட்டிவிடு மாரியாத்தா
(செல்லாத்தா)

பசும்பாலைக் கறந்துகிட்டு கறந்தபால எடுத்துகிட்டு
புற்றினிலே ஊற்ற வந்தோம் மாரியாத்தா
நீ பாம்பாக மாறி அதைப் பாங்காகக் குடித்துவிட்டு
தானாக ஆடிவா நீ மாரியாத்தா
உந்தன் பெருமையை இந்த உலகுக்கு எடுத்து பாடாட்டா
இந்த ஜென்மமெடுத்து என்ன பயனென்று சொல்லடி நீயாத்தா
(செல்லாத்தா)

ஆதி சக்தி மாதா, கருமாரி மாதா - எங்கள்
ஆதி சக்தி மாதா, கருமாரி மாதா!

அம்மா......படவேடு தாயே!
மனம் இரங்கி என்னைப் பார்க்க மாட்டாயா? "என் முருகனுக்கு என்னை விதி" என்ற இம்மாற்றம், நாம் கடவா வண்ணமே நல்கு!

பேருண்மை நீயேயடி!

2011-07-20T22:00:00.004-04:00

காருண்ய தேவதையே காப்பாற்று காமினியே
பேருண்மை நீயேயடி!
வேருண்ட மண்போல நீயுண்ட என்மனதால்
வேறுண்மை தேடேனடி!

நீருண்ட மேகமென நீண்டிருக்கும் குழலழகி
நிலங்கொண்டு பதம்பணிந்தேன்!
காடுண்ட இருள்போல கருத்திருக்கும் விழியழகி
வலங்கொண்டு வணங்குகின்றேன்!

படங்கொண்ட அரவணிந்த பரமசிவன் நாயகியே
சிரங்கொண்டு பதம்பணிந்தேன்!
விடங்கொண்ட கண்டனவன் இடமிருக்கும் பைங்கிளியே
மனங்கொண்டு வணங்குகின்றேன்!

--கவிநயா

வர வேண்டும் வர வேண்டும் தாயே!

2011-06-27T21:41:00.011-04:00

வர வேண்டும் வர வேண்டும் தாயே – ஒரு வரம்
தர வேண்டும் தர வேண்டும் நீயே – அம்பா
(வர வேண்டும் )

அறம் வளர்க்கும் அம்பா பர்வத வர்தனி
ஐயாறு தனில் மேவும் தர்மசம் வர்தனி – திரு
வையாறு தனில் மேவும் தர்மசம் வர்தனி
(வர வேண்டும் )

தான் எனும் அகந்தை தலைக்கு ஏறாது
தாழ்ந்த என் நிலையில் தர்மம் மாறாது
வான் புகழ் வள்ளுவன் வகுத்த நன்னெறியினில்
வையகம் வாழ்ந்திட வரம் அருள் தாயே – இவ்
வையகம் வாழ்ந்திட வரம் அருள் தாயே
(வர வேண்டும் )

பத்மா சூரி என்கிறவங்க இந்தப் பாடலை இடும்படி கேட்டிருந்தாங்க. பாடல் ஆசிரியர் யார்னு தெரியலை. பாடல் வரிகளைத் தந்த தம்பி சங்கருக்கு நன்றிகள் பல. பத்மா கேட்டிருந்த பாடகர்களின் குரலில் பாடல் கிடைக்கலை; சங்கரே பாடி அனுப்பறேன்னு சொல்லி இருக்கார். அனுப்பிய பிறகு இங்கே சேர்த்துடறேன்...

இதோ... பாடல் சங்கர் குரலில்... நன்றி சங்கர்!

அன்புடன்
கவிநயா

சின்னச் செவ்விதழில்...

2011-06-20T21:35:00.003-04:00

சின்னச் செவ்விதழில்
சிறுநகை பூத்திருக்கும்

கருவிழியில் கருணைமழை
அருவியெனப் பொழிந்திருக்கும்

நெற்றித் திலகஒளி
நீள்நிலத்தை வழிநடத்தும்

கைவளைகள் கலகலத்து
காற்றினிலே ஒலிபரப்பும்

காதணியின் அசைவினிலே
கண்மலர்ந்து சொக்கிநிற்கும்

பொற்சிலம்புப் பாதங்கள்
பூஞ்சிறகாய் உயிர்அணைக்கும்!

--கவிநயா

அன்பாலே பாடுகிறேன்...

2011-06-13T21:08:00.003-04:00

உன்மேலே அன்புகொண்டேன் உன் னாலே
அன்பாலே பாடுகிறேன் தன் னாலே

அம்மாநீ வந்து நின்றால் முன் னாலே
என்வாதை தீருமடி தன் னாலே

ஆயிரம் ஆயிராமாய் குற்றங்குறை கள்இருக்கும்
பாடுகின்ற பாடலிலும் எத்தனையோ பிழையிருக்கும்
ஆயிரம் இருந்தாலும் நானுமுன் பிள்ளையன்றோ
தாயென நீபரிந்தால் வெந்தணலும் சந்தனமன்றோ

--கவிநயா

அன்னையே அபிராமியே!

2011-06-06T22:10:00.002-04:00

அன்பாலே வந்தென்னை அமுதாக ஆட்கொண்டாய்
அன்னையே அபிராமியே!
உன்பாலே எனை ஈந்தேன் உலகெல்லாம் ஆள்கின்ற
உண்மையே உமைராணியே!

செந்தா மரைப்பூவே சிந்தாத செந்தேனே
சிந்தைநிறை சிவகாமியே!
வண்டாடும் மலர்போல கொண்டாடு வேனுன்னை
என்தாயே சுகவாணியே!

பந்தாடும் வாழ்விதனை உன்பாத கமலத்தில்
மலராகத் தந்துவிட்டேன்!
மண்ணோடும் வேர்போலே உள்ளோடும் உன்றனையே
கொழுகொம்பாய்க் கொண்டுவிட்டேன்!

அந்தமெதும் இல்லாத விந்தைமிகும் என்தாயே
சொந்தமென வந்தவளே!
சந்ததமும் உனைப்போற்றி செந்தமிழால் பாடுந்தொழில்
தந்திடுவாய் என்றன்மயிலே!!

--கவிநயா

தமிழிசை: நீ இரங்காய் எனில் புகலேது?

2011-06-02T19:41:00.107-04:00

அம்மன் பாட்டு-ன்னாலே கவிநயா அக்கா தான்!
இருந்தாலும் அம்மா-க்கு பொண்ணுங்களை விட பசங்க தான் ஒரு சுத்து ஜாஸ்தியா பிடிக்குமாம்!:)

அதனால் நான்...இன்று, இங்கு, அம்மன் பாட்டிலே...
ஆதி சக்தி வீட்டில் எந்தன்
நாதி கிடக்கும் - என்
மீதி உயிர் மீது அவன்
பார்வை பிறக்கும்

கந்தன் மனக் கல்லுருகும்
காலம் வரைக்கும் - உன்
தோளே கதி, தாளே கதி
தோகை மயிலே!

அம்மா...நீ இரங்காய் எனில், புகல் ஏது?

பலருக்கும் இந்தப் பாட்டு தெரியும்!
புகழ்பெற்ற இந்தப் பாடலை இயற்றியவர்: பாபநாசம் சிவன் (தஞ்சை இராமையா)!

தஞ்சைக்கு அருகில் உள்ள பாபநாசத்தில், ஒரு சிவன் கோயில்! உடல் முழுக்க திருநீறு பூசிக் கொண்டு, கோயிலில் போக்கற்று திரிந்த காலத்தில், இவர் பாடிக் கொண்டே இருப்பதைக் கண்டு, அவ்வூர் மக்கள்...
நம்மூரு "பாபநாசத்தில் ஒரு சிவன்" போல இருக்கிறாரே என்று வியக்க...அதுவே நாளடைவில் "பாபநாசம் சிவன்" என்றே நிலைத்து விட்டது!

கர்நாடக இசையில் தமிழ்ப் பாடல்கள் சொற்பமாக இருந்த காலத்திலே...
தமிழ்ப் பாடல்களாக எழுதிக் குவித்த அண்ணல்! தமிழ்த் தியாகைய்யர் என்றும் போற்றுவார்கள்! 1973-இல் மறைந்தார்!
தமிழிசை, மற்றும் தமிழ்மொழியில் கர்நாடக இசை...இரண்டுக்கும் பெருந்தொண்டு ஆற்றியவர் நம் பாபநாசம் சிவன்!

நீ இரங்காயெனில் புகலேது - இந்தப் பாடலின் பின் ஒரு கதையும் உண்டு!

இதை சினிமாவுக்காக எழுதிக் கொண்டு சென்றார் சிவன்! ஆனால் அந்த இசையமைப்பாளர் கண்டு கொள்ளவில்லை! மனமொடிந்த சிவன், இதை இராஜாஜி-யிடம் காண்பிக்க...
அவர் அதை எம்.எஸ் அம்மாவிடம் காண்பிக்க, ஆழ்வார் பாசுரம் போலவே இருக்கே-ன்னு எம்.எஸ் அதை "ஹம்" பண்ணிக் காட்ட, அருகில் இருந்த பலரும் சொக்கிப் போய் விட்டார்கள்!

பின்பு.....எம்.எஸ் அதை உருக உருகப் பாடி.....
ஒரு மறுதலிக்கப்பட்ட பாடல்...
ஏற்றுக்கொண்ட பாடலாகி...
மேடை தோறும் மேடை தோறும்...

அகலகில்லேன் இறையும் என்று அலர்மேல் மங்கை உறை மார்பா
புகல் ஒன்றில்லா அடியேன்,
நீ இரங்காய் எனில் - புகல் ஏது?

கேட்டுக் கொண்டே வாசியுங்கள்!
* எம்.எஸ்.சுப்புலட்சுமி
* மகாராஜபுரம் சந்தானம்
* நாதசுரம் - Fusion - கோகுல்

நீ இரங்காய் எனில் புகல் ஏது? - அம்பா
நிகில ஜகன்னாதன் மார்பில் உறை திரு
(நீ இரங்காய் எனில்)

தாய் இரங்கா விடில், சேய் உயிர் வாழுமோ?
சகல உலகிற்கும் நீ, தாய் அல்லவோ அம்பா?
(நீ இரங்காய் எனில்)

பாற்கடலில் உதித்த திருமகளே - செள
பாக்ய லட்சுமி என்னைக் கடைக்கணியே
நாற்கவியும் பொழியும் புலவோர்க்கும் - மெய்
ஞானியர்க்கும் உயர் வானவர்க்கும் அம்பா
(நீ இரங்காய் எனில்)

வரிகள்: பாபநாசம் சிவன்
ராகம்: அடானா
தாளம்: ஆதி

பிற கலைஞர்கள்: (One Stop Shop)
* சாக்ஸோஃபோன் - கத்ரி கோபால்நாத்
* வயலின் - குன்னக்குடி
* வீணை - காயத்ரி

* சுதா ரகுநாதன்
* மும்பை ஜெயஸ்ரீ
* உன்னி கிருஷ்ணன்

ஓர் சக்தி அவளே!

2011-05-30T21:44:00.004-04:00

ஓம்சக்தி ஓம்சக்தி என்று பாடுவோம்
ஓயாமல் அவள்நாமம் என்றும் ஓதுவோம்
உன்சக்தி என்சக்தி என்றிங் கில்லை
ஓர்சக்தி அவளேயென் றுணர்வோம் உண்மை

சரணடைந்தால் சூலமேந்தி வருவாள் சக்தி
மரணங்கூட அணுகாமல் காப்பாள் சக்தி
பரமென்றே தொழுதுநின்றால் மகிழ்வாள் சக்தி
சிவமோடு சேர்ந்துஅருள் பொழிவாள் சக்தி

சக்திஅவ ளாலேதான் உலகம் இயங்கும் - அவளை
பக்திசெய்ய மறந்தாலே உள்ளம் மயங்கும்
சக்திசக்தி சக்தியென்று சிந்து பாடுவோம் - மாய
சக்திதனை வென்றுஅவளின் பாதம் தேடுவோம்!

--கவிநயா

படத்துக்கு நன்றி: தினமலர்

ஹிந்தோளம் ராகத்தில் வெகு பொருத்தமாக அமைத்து அருமையாக பாடித் தந்த சுப்பு தாத்தாவிற்கு நன்றிகள் பல!

நீ என்றன் அன்னையன்றோ?

2011-05-23T22:12:00.001-04:00

கணந்தோறும் உன்னைக் கருத்துடன் பூஜித்தேன்
கருணை கொஞ்சம் வைப்பாய் நீ
மனம் காட்டுகின்ற மாயைகள் நம்பாமல்
உன்னை நம்ப வைப்பாய் நீ

கரடு முரடான என்றன் மனதினைச்
செப்பனிட்டு வைத்தேன் நான்
குறைகள் இருந்தாலும் பொறுத்துக் கொள்ள வேணும்
தங்க மனத் தாயே நீ

சிரமம் பாராமல் சிங்கத்தை விடுத்து
என் மனம் குடிபுகுவாய்
காணாத வினைகளும் தானாக ஓடிடுமே
உன் முகம் கண்டதுமே

எத்தனை பிழைகள் நான் செய்தாலென்ன
நான் உன்றன் பிள்ளையன்றோ
மன்னித்து உன்னடி சேர்த்துக் கொள்ள வேணும்
நீ யென்றன் அன்னையன்றோ?

--கவிநயா

படத்துக்கு நன்றி: http://www.flickr.com/photos/arunar/2777658592/

இமைப்பொழுதும் நீங்காதிரு!

2011-05-16T21:46:00.003-04:00

இமைப்பொழுதும் என்நெஞ்சில் நீங்கா திருப்பாய்
இல்லை ஒருதுயரம் எனநீயே உரைப்பாய்
கணப்பொழுதில் மறைகின்ற மின்னல் போலன்றி
எப்பொழுதும் என்னுள்ளே பரிதியாய் ஒளிர்வாய்

சுடுநெருப்பின் வெம்மைபோல் குளிர்நீரின் தண்மைபோல்
இலைஉடுக்கும் பசுமைபோல் வான்நிலவின் வெண்மைபோல்
ஒருநொடியும் அகலாமல் என்னுள்ளே நிறைவாய்
உருகாத பனியாகி உள்ளத்தில் உறைவாய்

உன்னடிகள் உறுதியுடன் பற்றும்வரம் தருவாய்
உன்னையன்றி ஒருநினைவும் அற்றிடவே அருள்வாய்
மயக்கம்தரும் மாயைஎனும் மருள்நீக்க வருவாய்
இயக்கத்தின் மூலமே எம்மைக் காத்தருள்வாய்

--கவிநயா

சஞ்சலம் அகற்றிடுவாய்!

2011-05-10T15:40:00.005-04:00

சஞ்சல மகற்றிடுவாய் - அம்மா
அஞ்சலென் றணைத்திடுவாய்
அஞ்சன விழி உமையே - சிவன்
கொஞ்சு கின்ற சிவையே

தஞ்சமென் றுனை அடைந்தேன் - எழில்
அஞ்சுகமே அருள்வாய்
கஞ்சமலர்ப் பதங்கள் - என்றன்
நெஞ்சினிலே பதிப்பாய்

துஞ்சிடும் பொழுதினிலும் - அம்மா
என்னுடனே இருப்பாய்
விஞ்சிடும் அன்புடனே - என்னை
இருகரத் தாலணைப்பாய்

--கவிநயா

சுப்பு தாத்தா அடானா ராகத்தில் பாடுகிறார். மிக்க நன்றி தாத்தா!

படத்துக்கு நன்றி: http://jmdtutor.com/images/wallpaper/god/goddess_durga_wallpapers02.jpg

த்ரிபுரசுந்தரி மா (சாயி பஜன்)

2011-04-28T11:14:00.002-04:00

த்ரிபுரசுந்தரி மா - அம்ப
தயாஸாகரி மா
சுந்தர வதனி மா - அம்ப
சுகுண மனோகரி மா
ஜய ஜகத்ஜனனி மா - அம்ப
ஜகதோத்தாரினி மா
பர்த்தி நிவாஸினி மா - அம்ப
பாப விமோசனி மா

மூவுலக அழகியே அம்மா - அம்மா
கருணைக்கடலே அம்மா
அழகு முகத்தவளே அம்மா - அம்மா
நற்குணத்தவளே அம்மா
உலகன்னையே அம்மா - அம்மா
உலகை உயர்த்துபவளே அம்மா
பர்த்தியில் வாழ்பவளே அம்மா - அம்மா
பாவத்தை நீக்குபவளே அம்மா

அன்னையே அருந்துணையே!

2011-04-11T21:58:00.002-04:00

அன்னையே அருந்துணையே அகிலாண்ட நாயகியே
உண்மையே உறுதுணையே உலகாளும் ஈஸ்வரியே

சரணென் றுனை அடைந்த பின்னே சஞ்சலங்கள் ஏதம்மா?
மரணம் வந்து தழுவும் போதும் நாமம் சொல்லும் நாவம்மா

உனதன்பே அனுதினமும் நான்வேண்டும் வரமாகும்
உன்நினைவே என்னோடு கூடவரும் துணையாகும்
கள்ளமில்லா பிள்ளையன்பை உன்றன்மீது தரவேண்டும்
உன்னையன்றி பிறநினைவெல்லாம் என்னைவிட்டு அறவேண்டும்

--கவிநயா

அடுத்த வாரம் முதல் விடுமுறையில் போறேன். கணினியைத் தொட வாய்ப்பு கிடைப்பது சந்தேகம். விடுமுறை எனக்கு, விடுதலை உங்களுக்கு! :) பிறகு பார்க்கலாம்...

அன்னையின் அருள் அனைவருக்கும் நிறையட்டும்.

ஏதும் அறியேன்...

2011-04-04T21:49:00.004-04:00

மெய்ப்பொருள் அறியேனை, திருப்பதம் பணியேனை
விருப்புடன் ஏற்றிடு வாயோ அம்மா?
பொய்ப்பொருள் தனில்ஆழ்ந்து, வினைக்குழி தனில்வீழ்ந்து
மறுகிடும் எனைக்கண்ணால் பாராய் அம்மா

மலைபோல் துயரங்கள் எனைச்சூழ்ந் திருக்கையிலும்
மழைபோல் அழுதிருந்தேன் மங்கையுனை நினைக்கவில்லை
கடல்போல் துயரங்கள் எனைச்சூழ்ந் திருக்கையிலும்
கலங்கித் தவித்திருந்தேன் கன்னியுனை நினைக்கவில்லை

வேதங்கள் யாகங்கள் ஏதும் அறியேனம்மா
யோகமும் தியானமும் செய்யத் தெரியேனம்மா
ஏதுமறியா எனக்கும் உன்னருள் கிடைத்திடுமோ?
பதமலர் சேரும்(அ)ந்த சுகவரம் கிடைத்திடுமோ?

--கவிநயா

சுப்பு தாத்தா செஞ்சுருட்டி ராகத்தில் அமைத்து பாடியிருக்கிறார்... மிக்க நன்றி தாத்தா!

வரமொன்றும் வேண்டாம்!

2011-03-28T22:26:00.001-04:00

வரமொன்றும் வேண்டாம் – உன்
வரவொன்றே வேண்டும்
அம்பிகை ஈஸ்வரியே – உன்னை
நம்பினேன் பார்வதியே
(வர)

திருப்பத நிழலினில் இளைப்பாற வேண்டும்
விருப்புடன் உன்றன் புகழ் தினம் பாட வேண்டும்
(வர)

நீண்ட நெடுங் கடலினில் நீந்திமிகக் களைத்திட்டேன்
மீண்டு வரும் வழியேதும் காணாமல் திகைத்திட்டேன்

மந்திரம் போலவே மங்கையுன் நினைவு தந்தாய்
தந்திர மாயெனது நெஞ்சமலர் கொய்து சென்றாய்

விந்தை யிலும் விந்தை கண்டேன்
துன்பத் திலும் இன்பம் கண்டேன்

சொந்தமென உன்னைக் கொண்டேன்
சேவடிகள் போற்றி நின்றேன்
(வர)

--கவிநயா

சுப்பு தாத்தா குரலில், இசையில், தேவகாந்தாரி ராகத்தில்... மிக்க நன்றி தாத்தா!

அஷ்டலக்ஷ்மி ஸ்தோத்ரம்

2011-03-21T19:45:00.002-04:00

அஷ்டலக்ஷ்மி ஸ்தோத்ரம் தமிழில் தேடிய போது கிடைக்கலை. (எனக்கு ஆங்கிலத்தில் எழுதி படிப்பதை விட தமிழில் படிக்கிறதுதான் சுலபம் போல தோணும் :). அதனால ஆடியோவில் கேட்டு தமிழில் எழுதினேன். தவறு இருந்தால், தெரிந்தவர்கள் திருத்தும்படி கேட்டுக்கறேன். என்னைப் போல தேடுபவர்களுக்கு பயன்படுமே என்று இங்கே இடறேன்...

கேட்டுக்கிட்டே படிக்கலாம்...

சுமனஸவந்தித சுந்தரி மாதவி
சந்த்ர சஹோதரி ஹேமமயே
முனிகண மண்டித மோக்ஷ ப்ரதாயினி
மஞ்சுள பாஷிணி வேதனுதே
பங்கஜ வாசினி தேவஸு பூஜித
சத்குண வர்ஷிணி சாந்தியுதே
ஜெயஜெய ஹே மதுசூதன காமினி
ஆதிலக்ஷ்மி சதா பாலயமாம்

அயிகலி கல்மஷ நாஷினி காமினி
வைதிக ரூபிணி வேதமயே
க்ஷீர சமுத்பவ மங்கள ரூபிணி
மந்த்ர நிவாஸினி மந்த்ரனுதே
மங்கள தாயினி அம்புஜ வாஸினி
தேவ கணாஷ்ரித பாதயுதே
ஜெயஜெய ஹே மதுசூதன காமினி
தான்யலக்ஷ்மி சதா பாலயமாம்

ஜெயவர வர்ஷிணி வைஷ்ணவி பார்கவி
மந்த்ர ஸ்வரூபிணி மந்தரமயே
ஸுரகண பூஜித ஷீக்ர ஃபலப்ரத
ஞான விகாஸினி ஷாஸ்த்ரனுதே
பவபய ஹாரிணி பாப விமோசனி
சாது ஜனாஷ்ரித பாதயுதே
ஜெயஜெய ஹே மதுசூதன காமினி
தைர்யலக்ஷ்மி சதா பாலயமாம்

ஜெயஜெய துர்கதி நாஷினி காமினி
ஸர்வ ஃபலப்ரத ஷாஸ்த்ரமயே
ரதகஜ துரகபதாதி ஸமாவ்ருத
பரிஜன மண்டித லோகனுதே
ஹரிஹர ப்ரஹ்ம ஸுபூஜித சேவித
தாப நிவாரிணி பாதயுதே
ஜெயஜெய ஹே மதுசூதன காமினி
கஜலக்ஷ்மி ரூபேண பாலயமாம்

அயி ககவாஹினி மோஹினி சக்ரிணி
ராகவி வர்தினி ஞானமயே
குணகண வாரிதி லோக ஹிதைஷிணி
ஸ்வரஸப்த பூஷித கானனுதே
சகல சுராசுர தேவ முனீஷ்வர
மானவ வந்தித பாதயுதே
ஜெயஜெய ஹே மதுசூதன காமினி
சந்தானலக்ஷ்மி த்வம் பாலயமாம்

ஜெய கமலாசனி ஸத்கதி தாயினி
ஞான விகாஸினி கானமயே
அனுதின மர்ச்சித குங்கும தூசர
பூஷித வாஸித வாத்யனுதே
கனகதா ராஸ்துதி வைபவ வந்தித
ஷங்கர தேசிக மான்யபதே
ஜெயஜெய ஹே மதுசூதன காமினி
விஜயலக்ஷ்மி சதா பாலயமாம்

ப்ரணத ஸுரேஷ்வரி பாரதி பார்கவி
சோக விநாஷினி ரத்னமயே
மணிமய பூஷித கர்ண விபூஷண
ஷாந்திஸமாவ்ருத ஹாஸ்யமுகே
நவநிதி தாயினி கலிமல ஹாரிணி
காமித ஃபலப்ரத ஹஸ்தயுதே
ஜெயஜெய ஹே மதுசூதன காமினி
வித்யாலக்ஷ்மி சதா பாலயமாம்

திமிதிமி திந்திமி திந்திமி திந்திமி
துந்துபி நாத ஸுபூர்ணமயே
குமகும கும்கும கும்கும கும்கும
ஷங்கநி நாதஸு வாத்யனுதே
வேத புராண திஹாச ஸுபூஜித
வைதிக மார்க ப்ரதர்ஷயுதே
ஜெயஜெய ஹே மதுசூதன காமினி
தனலக்ஷ்மி ரூபேண பாலயமாம்

அன்புடன்
கவிநயா

பக்திக்குள்ள நீயிருக்கே!

2011-03-14T22:29:00.003-04:00

பாலுக்குள்ள நெய்யிருக்கு
பருத்திக்குள்ள துணியிருக்கு
வித்துக்குள்ள மரமிருக்கு அம்மா செல்லம்மா – எம்
பக்திக்குள்ள நீயிருக்கே அம்மா சொல்லம்மா

சிக்கிமுக்கிக் கல்லுக்குள்ள
சிக்கிக்கிட்ட தீயப்போல
சித்தத்துல சிக்கியிருக்கே அம்மா செல்லம்மா – அந்த
பித்துலநாம் பாடுறனே அம்மா சொல்லம்மா

ஊனுசுரு மறைஞ்சாலும்
ஒன்நெனப்பு மறையாது
மண்ணோடும் வேரப்போல அம்மா செல்லம்மா – நீ
உள்ளோடி இருக்குறியே அம்மா சொல்லம்மா!

--கவிநயா

சுப்பு தாத்தா பிருந்தாவன சாரங்கா ராகத்தின் சாயலில், நாட்டுப்புறப் பாடலாக பாடியிருக்கிறார். மிக்க நன்றி தாத்தா!

உன்மீது பித்தான அன்பொன்றே வேண்டும்!

2011-03-07T21:52:00.004-05:00

சுப்பு தாத்தாவின் குரலில், இசையில்... மிக்க நன்றி தாத்தா!

ஆய்ந்தாய்ந்து பார்க்கின்ற அறிவெனக்கு வேண்டாம்!
ஞாலமெலாம் புகழ்கின்ற ஞானமும் வேண்டாம்!
ஆண்டாண்டு காலமாய் புவியாளும் தேவீ!
உன்மீது பித்தான அன்பொன்றே வேண்டும்!

உன்அன்பின் மதுவுண்டு நான்களிக்க வேண்டும்!
அம்மதுவின் போதையிலே எனைமறக்க வேண்டும்!
பக்தர்களின் இதயங்களைக் கொள்ளைகொள்ளும் காளீ!
உனதன்புக் கடலினிலே எனைமூழ்க வைநீ!

சுழல்கின்ற புவியோடு உணர்வுபல சுழலும்;
உலகெல்லாம் உன்னுடைய மாயைதனில் உழலும்!
சிரிப்போரும் அழுவோரும் மகிழ்வோரும் உண்டு;
சிறிதும்உன்னை நினையாது மரிப்போரும் உண்டு!

யேசுவும், மோசஸும், புத்தர், கௌரங்காவும்
உன்னன்பின் மதுவருந்தி போதையிலே திளைத்தார்;
நானும் அந்நிலையடைந்து அவரோடு களிக்கும்
நாளெந்த நாளோ? நீசொல்வாய் அம்மா!

--கவிநயா

('Gospel of Sri Ramakrishna' புத்தகத்திலிருந்து 'make me mad with thy love' என்ற பாடலை தழுவி எழுதியது)

திருவடி மலரினை...

2011-02-28T20:58:00.002-05:00

திருவடி மலரினை மனவண்டு சுற்றும்
மறுபடி மறுபடி மலரடி பற்றும்
அவளடி எழிலினில் மயங்கிடும் சித்தம்
இணையடி நிழலினை நாடிடும் நித்தம்

கிண்கிணிச் சலங்கைகள் எங்கெங்கும் ஒலிக்கும்
பொன்மணி பாதங்கள் பூக்களைப் பழிக்கும்
வெண்பிஞ்சுப் பதங்களை வேதங்கள் துதிக்கும்
தண்மலர் திருவடி நெஞ்சினில் இனிக்கும்

பொன்னடி போற்றிட பைங்கிளி வருவாய்
கண்மணியே என்றன் கருத்தினில் நிறைவாய்
உன்புகழ் பாடிட திருவருள் புரிவாய்
ஒவ்வொரு நொடியுமென் உள்ளத்தில் உறைவாய்

--கவிநயா

தாயே, உன் பையன்...

2011-02-24T00:20:00.010-05:00

ஆற்று வெள்ளம், நாளை வரத்
தோற்றுதே குறி - அம்மா
கண்ணில் வெள்ளம், நித்தம் வரக்
குறி சொல்வாயோ?

தாயி என்று, கால் பிடித்துக்
கெஞ்சும் பிள்ளையை - இன்று
நோக வைத்து, நொங்க வைத்து
நடம் புரிவாயோ?
--------------------------------------

பிறந்த வீட்டில், பட்டாம் பூச்சி
போலப் பறந்தேன் - என்னைப்
பிடித்து வந்துன், பிள்ளை வீட்டில்
வளர்த்த ஈஸ்வரி...

குன்றில் உந்தன் பிள்ளை யவன்
கோவித்துக் கொண்டால் - மனம்
கொஞ்சமும் இரங்கான் இதைச்
சொல்ல வில்லையே!
--------------------------------------

மக மாயி உன்னை நம்பி வந்த
பெண்ணைப் பாரடி!
குக தாயி எந்தன் கண் துடைக்க
கை வரல்லையோ?

அரங்க நகர் அப்பன் அங்குச்
சோறு ஊட்டுவான் - இங்கே
இரங்க யாரும் எனக்கில்லை
அஞ்சொல் நாயகீ!
------------------------------------

ஆதி மூலம், என்றே அன்று
ஆனை பிளிற - அப்பா
ஓடி வந்தார், அங்குச் சொல்ல
மனம் வரல்லையே!

ஏது பிழை செய்திடினும்
எனக்கு இங்கே - அம்மா
பக்கத் துணை நீ ஒருத்தி
நீ ஒருத்தியே!
-------------------------------

ஆதி சக்தி வீட்டில் எந்தன்
நாதி கிடக்கும் - என்
மீதி உயிர் மீது அவன்
பார்வை பிறக்கும்!

கந்தன் மனக் கல் உருகும்
காலம் வரைக்கும் - உன்
தோளே கதி, தாளே கதி
தோகை மயிலே! - அம்மா....

தோளே கதி, தாளே கதி...
கற்பகாம்பிகே!!!

உன்னை நினைந்து...

2011-02-21T21:17:00.003-05:00

உன்னை நினைந்து உருகும் உள்ளத்தில்
குடியிருப்பாய் அம்மா
தன்னை மறந்து தாய் உன்னைப் பாடிட
அருள் புரிவாய் அம்மா

மின்னற் கொடிபோல் வடிவழகுடைய
அன்னைஉன் பெருமைகளை
கன்னல் மொழியாம் தமிழினில் பாட
அருளிடுவாய் அம்மா

உலகத்தை எல்லாம் உண்டாக்கி அதில்
நீயும் உறைந்தாயே
உழலும் உயிர்களை உய்வித்திடவே
கருணை வைத்தாயே

என்சிற் றறிவுக்கு சிறிதும் எட்டாத
பரம்பொருளே உமையே
சிற்றெறும்பானாலும் அருள் தருவாய் உன்
கருணைக் கிணைஇலையே

விதிக்கிடைப் பட்டு வலிபல பெற்று
வாடுகின்றேன் அம்மா
உன்விழிக்கடைப் பார்வை என்மேல் பட்டால்
வாழ்ந்திடுவேன் அம்மா

ஆயிரம் கண்களில் கருணைக் கடலை
ஏந்தி நிற்கும் அம்மா
அந்தக்கருணையில் ஒருதுளி என்திசை தெறித்திட
ஏங்குகிறேன் அம்மா

உன்திருவடியில் ஒருதுகளாய் நான்
கிடந்திட வேண்டும் அம்மா
உன்மலரடிகளை மறவா மல்நான்
இருந்திட வேண்டும் அம்மா

--கவிநயா

மீனாக்ஷி நீ ஆதரி!

2011-02-18T11:35:00.005-05:00

காத்யாயனி கதம்ப வனவாசினி கடைக்கண் பாரம்மா..
எனை பார்த்தலும் பாரமா? இக்ஷனமே..

சோதனை தாளேன் கோவிந்தன் சோதரி
மீனாக்ஷி நீ ஆதரி.. இக்ஷணமே..

தஞ்சம் எனவந்து கெஞ்சும் பஞ்சைக்கு
கஞ்சப் பூம்பதத்தின் கொஞ்சும் பொன்கொலுசு
அஞ்சேல் அஞ்சேல் என செஞ்சொல்லை கூறாதா?
நெஞ்சின் சஞ்சலம் தீராதா? இக்ஷணமே..

--சங்கர்

பி.கு.: பார்த்தோன்னே தெரிஞ்சிருக்குமே என் பாட்டு இல்லைன்னு? :) அவ்ளோ சூப்பரா இருக்கு, அவள் மேலான சங்கரின் முதல் பாடல்! அவர் பூர்வி கல்யாணி ராகத்தில் அமைச்சிருக்காராம். அவர் அனுப்பின பிறகு அதையும் சேர்த்துடுவோம் -- கவிநயா

சுப்பு தாத்தா தோடி ராகத்தில் விருத்தமாக அமைத்திருக்கும் அழகைக் கேட்டு மகிழுங்கள்!

சொல்லனைத்தும் இனிக்குது!

2011-02-14T19:55:00.003-05:00

சொல்லனைத்தும் இனிக்குதடி சுந்தரியே
உன்னைச் சொல்லிச் சொல்லிப் பாடப் பாட சுந்தரியே
கள்ளெடுத்துக் குடித்ததுபோல் சுந்தரியே
ஒரு களிமயக்கம் வருகுதடி சுந்தரியே

தெள்ளுதமிழ் சொல்லெடுத்து
தேவியுன்னை பாடிடுவேன்
துள்ளும்இசைச் சரம்தொடுத்து
நாளுமுன்னை வாழ்த்திடுவேன்

கண்ணிமைக்குள் உன்னை வைத்து
கண்மணியே போற்றிடுவேன் - நீ
கண்ணெடுத்து பார்த்து விட்டால்
விண்ணைஎட்டிப் பிடித்திடுவேன்

--கவிநயா

திருவடி நிழலில் ஒரு இடம் தருவாய்!

2011-02-07T22:00:00.005-05:00

திருவடி நிழலில் ஒருஇடம் தருவாய் அம்மா ஸ்ரீசக்தி
தினம் உன்னைப்பாட வரமொன்று தருவாய் அம்மா சிவசக்தி

மனதினில் உன்றன் நினைவொன்றே வேண்டும் அம்மா ஸ்ரீசக்தி
மாயையி னின்றும் விடுதலை வேண்டும் அம்மா சிவசக்தி

ஐம்புலன் தன்னை அடக்கிட வேண்டும் அம்மா ஸ்ரீசக்தி
அனைத்திலும் உனையே கண்டிட வேண்டும் அம்மா சிவசக்தி

கலங்கிடும் உள்ளம் களிப்புற வேண்டும் அம்மா ஸ்ரீசக்தி
கலங்கரை விளக்காய் நீவர வேண்டும் அம்மா சிவசக்தி

கனிவாய் வருவாய் கடலாய் அருள்வாய் அம்மா ஸ்ரீசக்தி
உடனே வருவாய் உயிருள் நிறைவாய் அம்மா சிவசக்தி

--கவிநயா

சுப்பு தாத்தா, காம்போதியில் பாடியிருக்கார்... நன்றி தாத்தா!

பாதி மதி முடி சூடும் இறைவி

2011-01-31T21:17:00.005-05:00

மு.கு. : முன்பு ஒரு முறை வாணி ஜெயராம் அவர்கள் ஒரு படத்திற்காக பாடியிருந்த, "பாதி மதி நதி போது மணி சடை" என்று தொடங்கும் திருப்புகழை, நம்ம கண்ணன் முருகனருளில் இட்டிருந்தார். அதைக் கேட்ட போது அதே போல் நம்ம அம்மாவுக்காக எழுதணும்னு ஒரு (அற்ப) ஆசை ஏற்பட்டதன் விளைவு... :)

பாதி மதிமுடி சூடும் இறைவியை
பாடி அனுதினம் பணிவோமே
தேடி அவள்பதம் நாடி தினம்தினம்
கோடி மலர்கொடு தொழுவோமே

சூழும் சுரர்முடி பாதம் தொடஅதில்
காலின் நகங்களும் ஒளிவீச
கூறும் அடியவர் சூடி மகிழ்ந்திட
பாத நறுமலர் அருள்வாயே

சாடும் வினைகெட நாடி தொழுபவர்க்
கோடி உதவிடும் துணைநீயே
வாடும் மனதினில் வாச மலரென
வந்து மலர்ந்திடும் என்தாயே

வேலன் வணங்கிட வேலை அருளிய
வேத முதல்வியைப் பணிவோமே
காலன் கடுகினும் காவல் வருமவள்
கால்க ளேசதம் அறிவோமே

--கவிநயா

சுப்பு தாத்தா காவடி சிந்து மெட்டில் பாடியிருக்கார்... நன்றி தாத்தா!

அம்மா வருவாய்...

2011-01-24T21:22:00.004-05:00

அம்மா வருவாய் அல்லல் களைவாய்
அருள் புரிந்தென்னை ஆட்கொள்வாய்

அன்பைத் தருவாய் அகத்தில் நிறைவாய்
அடைக்கலம் தந்தென்னைக் காத்தருள்வாய்

கண்ணீரால் பதம் கழுவுகின்றேனே
கருணை சிறிதும் உனக்கில்லையோ

வென்னீராய் உள்ளம் கொதிக்கின்றதே - அதைக்
குளிரவைக்க மனம் வரவில்லையோ

கல்லோ உன்மனம் நானறியேன் - உன்னைக்
கனிய வைக்கும்வகை யும்அறியேன்

புல்லாம் என்மனம் பண்படுத்தி - அதில்
உன்பதம் ஒன்றே பதிய வைத்தேன்

அனுதினம் உன்பெயர் சொல்லுகின்றேன் - உன்
மலரடியில் சரணடைந்து விட்டேன்

கனிவுடன் என்திசை பார்த்தருள்வாய் - உன்
பிள்ளை என்னை ஏற்றுக் கொள்வாய்

--கவிநயா

சுப்பு தாத்தாவின் இசையில், குரலில்... நன்றி தாத்தா!

சித்தமெல்லாம் நிறைந்தாய்!

2011-01-17T21:46:00.002-05:00

சித்தமெல்லாம் நிறைந்தாய் சர்வேஸ்வரி - என்
பித்தும்நீ யேயானாய் புவனேஸ்வரி

விதிஎனும் வலைப் பட்டு மதி இழந்தேன் - உன்னை
கதிஎன்று கொண்ட பின்னே மனம் தெளிந்தேன்
சந்ததமும் உனைப் பணிந்து அகம் மகிழ்ந்தேன் - உன்னை
செந்தமிழால் பாடிப் பாடி உள்ளம் குளிர்ந்தேன்

பத்தும் பறந்து விடும் உன்னை நினைத்தால் - எந்த
பற்றும் அகன்று விடும் உன்னை துதித்தால்
ஒத்துஒரு மனதாய் உன்றன் நாமம் ஜெபித்தால் - பெரும்
சொத்தெனவே நீ கிடைப்பாய் அன்பு வரத்தால்

--கவிநயா