Monday, August 14, 2017

என் குரல் கேட்டு வர வேணும்!





அம்மா உந்தன் அருகிருக்க ஆசை கொண்டேனே
சும்மா சும்மா உன் பெயரைக் கூவிச் சொன்னேனே

கன்றின் குரல் கேட்டு
ஓடி வரும் பசு போல்
எந்தன் குரல் கேட்டு
நீயும் வர வேணும்
(அம்மா)          
உன் முகத்தைப் பார்க்கும் போது உள்ளம் களிக்கும்
உன் மடியில் தூங்கும் போது துயரும் சிரிக்கும்

கன்றின் குரல் கேட்டு
ஓடி வரும் பசு போல்
எந்தன் குரல் கேட்டு
நீயும் வர வேணும்
(அம்மா)         

உன் கையைப் பிடித்துக் கொண்டு உலகினில் நடப்பேன்
உன் புகழைப் பாடிக் கொண்டு பிறவியைக் கடப்பேன்

கன்றின் குரல் கேட்டு
ஓடி வரும் பசு போல்
எந்தன் குரல் கேட்டு
நீயும் வர வேணும்
              (அம்மா)          


--கவிநயா

Monday, August 7, 2017

வர வேண்டும்!



வெள்ளியன்று வரலக்ஷ்மி நோன்பிற்காக எழுதியது... உடனே பதிவிட முடியவில்லை...


கீதாம்மா வின் இனிய குரலில்... மிக்க நன்றி கீதாம்மா!

வரவேண்டும் வரவேண்டும் வரலக்ஷ்மி தாயே
தரவேண்டும் தரவேண்டும் அருட்செல்வம் நீயே
(வரவேண்டும்)

பாற்கடலில் உதித்த பரம எழில் வடிவே
பரந்தாமனின் மார்பில் குடிபுகுந்த திருவே
(வரவேண்டும்)

சகல செல்வங்களுக்கும் அதிபதி நீயே
சௌந்தர்ய ரூபிணியே சந்த்ர சகோதரியே
நிலையில்லா செல்வங்களில் நேசம் வையா மனமும்
விலையில்லா பக்தியையும் நிலையாகத் தந்தருள
(வரவேண்டும்)


--கவிநயா 



Tuesday, August 1, 2017

பத நிழல் போதும்

சுப்பு தாத்தா வின் ஆனந்த பைரவி விருந்து... மிக்க நன்றி சுப்பு தாத்தா!

கீதாம்மா வின் குரலிலும்... இரட்டை விருந்தாக..மிக்க நன்றி கீதாம்மா!

என் மனம் உருகாதோ?

உன்னடி பணியாதோ?

இரு விழி வழியாதோ?

பழ வினை கழியாதோ?



இதயத்தில் ஒரு ஏக்கம்

உதயத்தை எதிர் நோக்கும்

இருளினை அது ஓட்டும்

வரவர ஒளி கூட்டும்



கரு விழி கடை நோக்கில்

பிறவியும் கடைத் தேறும்

பலபிற விகள் தோறும்

பத நிழலது போதும்



இதழ் நெளியும் சிரிப்பில்

இதயத்தில் பூ வாசம்

மனம் மகிழும் களிப்பில்

மதுவென உன் நேசம்


--கவிநயா

(ஏனோ இம்முறை ப்ளாகரில் படம் இணைக்க முடியவில்லை.)

Monday, July 24, 2017

ஆடி மாசக் காத்து



கீதாம்மா வின் சிறப்பு கிராமிய விருந்து... மிக்க நன்றி கீதாம்மா!

ஆடி மாசக் காத்து போல ஆடுதம்மா மனசு, அதில்

அசையாத தீபம் போல எரியுந்தன் நெனைப்பு

(ஆடி)



ஆடியிலே கூழு காச்சி ஆத்தா ஒனக்குத் தரணும்

ஆசையாக அதக் குடிக்க வெரசா நீ வரணும்

பச்சரிசி அச்சு வெல்லம் பொங்க வெச்சுத் தரணும்

மச்ச விழி மாரியாத்தா இச்சை தீர்க்க வரணும்

(ஆடி)



ஓடி ஓடி அலஞ்சு தினம் பட்டதெல்லாம் போதும்

பாடிப் பாடிக் காலடியில் பணியவேணும் நானும்

நெனப்பெல்லாம் ஒன்னச் சுத்தி இருந்தாலே போதும்

கணக்காக இன்பமெல்லாம் தானா வந்து சேரும்

(ஆடி)


--கவிநயா

Monday, July 17, 2017

மதுரை மல்லிகை




கீதாம்மா வின் இனிய குரலில்... மிக்க நன்றி கீதாம்மா!

மதுரை மல்லிகை போலச் சிரிக்கும் மங்கல மீனாக்ஷி

இதய மடுவில் தாமரை உன் எழில் மிகு காட்சி

           

            விழி மூடிடும் போதினிலும்

                        தோன்றிடும் உன் முகமே

            பாடிடும் நாவினிலே தினம்

                        ஆடிடும் உன் பெயரே

(மதுரை)



தோளினிலே கிளியை அவள் தாங்கியிருப்பாள்

தாளில் விழுந்தோருக் கவள் தோள்கள் கொடுப்பாள்

           

            பச்சை நிற மேனி, அவள்

                        பாண்டி நாட்டு ராணி

            இச்சையுடன் தொழுபவரின்

                        துன்பந் தீர்க்கும் தோணி

(மதுரை)



சுந்தரனின் சுந்தரத்தில் சொக்கி விட்டவளாம்

மந்திரம்போல் அவன் சிரிப்பில் மயங்கி விட்டவளாம்



            போர் முனையில் சென்று

                        தனை மறந்து நின்று

            ஆயுதத்தைத் தவற விட்டு

                        அவன் அழகில் கிறங்கிச் சற்று

(மதுரை)


--கவிநயா