இனிய சுபகிருது தமிழ்ப் புத்தாண்டு வாழ்த்துகள்! அன்னையின் அருள் அனைவருக்கும் பொங்கிப் பெருகட்டும்!
ஓம் சக்தி ஓம் சக்தி ஓம் சக்தி ஓம்
ஓம் சக்தி ஓம் சக்தி ஓம் சக்தி ஓம்
பச்சை நிற மேனியினைப் பாந்தமுடன் பட்டாடை
பதவிசாய்த் தழுவி நிற்க
இல்லாத கொடியிடையை ஒய்யார ஒட்டியாணம்
இருப்பதாய்க் காட்ட முயல
அன்னையின் நடையழகில் அன்னங்கள் அணிவகுத்து
தமை மறந்து லயித்து நிற்க
காலோடு அணைந்திருக்கும் கொலுசிரண்டும்
கொஞ்சலுடன்
சிணுங்கிக் கிணுகிணுக்க
பஞ்சொத்த பாதங்கள் அஞ்சலெனச் சொல்வது போல்
சிறு மெட்டி முணுமுணுக்க
அழகான மதுரையை வளமாக ஆள்கின்ற
அன்னை மீனாட்சி உமையே
ஓம் சக்தி ஓம் சக்தி ஓம் சக்தி ஓம்
ஓம் சக்தி ஓம் சக்தி ஓம் சக்தி ஓம்
--கவிநயா
