ஏந்திழையே வாராயோ???

உள்ளேதான் இருக்கின்றாள்
உற்றுப்பார் என்கின்றார்
உள்ளிருக்கும் தேவதையே,
கண்ணில்பட மாட்டாயோ?

கள்ளிருக்கும் மலர்போலே
கருத்தினிலே இனிக்கின்றாய்
சொல்லோடு பொருள்போலே
சேர்ந்துசுவைத் திருக்கின்றாய்

சின்னஞ்சிறு குழந்தையைப் போலே
உன்னைமடி ஏந்திக் கொள்வேன்
உந்தன் மலர்அடிகள் எடுத்து
என்கூந்தல் சூடிக் கொள்வேன்

பண்ணெடுத்து பாட்டுச் சொல்லி
பத்திரமாய்ப் பார்த்துக் கொள்வேன்
என்னிடத்தில் இரக்கம் வைத்து
ஏந்திழையே வாராயோ???


--கவிநயா