மேகம் சொன்ன சேதி...

சுப்பு தாத்தா ஷண்முகப்ரியா ராகத்தில் இனிமையாகப் பாடியிருப்பதைக் கேட்டு மகிழுங்கள்! மிக்க நன்றி தாத்தா!

 
ஓடி வந்த மேகம் ஒன்று சேதி சொன்னது

ஓடம் இந்த வாழ்வில் உன்றன் நாமம் என்றது

பாடம் இதனைக் கற்றுக் கொண்டால் போதும் என்றது

தேடும் யாவும் நம்மை வந்து நாடும் என்றது

நீரைச் சுமந்து அலையும் என்னைப் பாரேன் என்றது

சுமையை இறக்க மழையைப் பொழிந்தால் போதும் என்றது

கவலை களைச் சுமந்து வாழ்வ தேனோ என்றது

அன்பைப் பொழிந்து வாழ்ந்து விட்டால் போதும் என்றது

காடும் மேடும் யாவும் ஒன்றுதானே என்றது

வாழ்வும் தாழ்வும் எல்லாம் ஒன்றுதானே என்றது

அன்னை யுன்றன் பாதத் தூளி போதும் என்றது

உண்மை உணர்ந்த பின்னே அமைதி சூழும் என்றது!

--கவிநயா