சொல்லு கிளியே... சொல்லு!

சுப்பு தாத்தா ஹிந்தோளம் ராகத்தில் அனுபவித்துப் பாடித் தந்ததைக் கேட்டு மகிழுங்கள்! மிக்க நன்றி தாத்தா!

பச்சை நிறமவள் தந்ததோ

இச்சைக் கிளியே நீ சொல்லு…

செவ்விதழ் முத்தத்தில் சிவந்ததோ

கொவ்வைக் கனிவாய் நீ சொல்லு!

(பச்சை)

பறந்து பறந்து திரியும் போது

பாதை மறந்தையோ,

நீயும் பாதை மறந்தையோ?

தத்தித் தத்தித் தவழ்ந்து வந்து

தோளில் அமர்ந்தையோ,

அவள் தோளில் அமர்ந்தையோ?

(பச்சை)

பாவம் என்று பரிந்து அன்னை

அனுமதித் தாளோ,

உன்னை அனுமதித் தாளோ?

பச்சை வண்ணப் பைங்கிளி யவள்

அரவணைத் தாளோ,

தோளில் அமர வைத்தாளோ?

(பச்சை)

சின்னக் கிளியே வண்ணக் கிளியே

தூது செல்வாயோ,

அன்னைக்கொரு சேதி சொல்வாயோ?

பாதை தேடி அலையும் பிள்ளையைப்

பார்க்கச் சொல்வாயோ,

பாதம் சேர்க்கச் சொல்வாயோ?

(பச்சை)

--கவிநயா