அன்னை அவளை நெஞ்சில் வை !

அன்னை அவளை நெஞ்சில்வை - அவள்
முன்னை வினைகளை ஓட்டிடுவாள்
விண்ணையும் மண்ணையும் படைத்த அவளே
உன்னையும் என்னையும் காத்திடுவாள்

முக்காலங்களும் அறிந்தவள் அவளே
எக்காலத்திலும் துணையிருப்பாள்
சொக்கநாதரின் சுந்தரி அவள்தம்
பக்கத்தில் நமக்கிடம் தந்திடுவாள்

லீலைகள் பலவும் புரியும் அவளே
மாயை களையும் களைந்திடுவாள்
மனதின் மயக்கம் நீக்கிடுவாள் - தனை
அடையும் மார்க்கமும் காட்டிடுவாள்

அன்பே உருவாய் அமைந்தவளாம் - அவள்
அருளாய் உள்ளில் உறைபவளாம்
கடலாம் கருணை நிறைந்தவளாம் - நமைக்
கனிவாய்க் காக்கும் தாய் அவளாம்!


--கவிநயா