மதுரை நகர் தேவியே!

இன்றைக்கு திவாகர்ஜியின் நேயர் விருப்பம் :)

மதுரைநகர் தேவியே மண்ணாளும் ராணியே

மனதினிலும் குடிபுகுந்து எமைஆள் மீனாக்ஷியே

(மதுரை)

மோகனமாய்ச் சிரிப்பவளே மோகமெல்லாம் எரிப்பவளே

சோகமெல்லாம் தீர்ப்பவளே சுவர்க்கமென இனிப்பவளே

திக்கெட்டும் ஜெயித்தவளே திகம்பரனை மணந்தவளே

சொற்கட்டின் உட்புகுந்து நற்பொருளாய் திகழ்பவளே

(மதுரை)

கிளிப்பிள்ளை போலநானும் உன்பெயரைச் சொல்லிடணும்

சிறுபிள்ளை போலஉன்னைச் சுற்றிச்சுற்றி வந்திடணும்

விழிக்குள்ளே உன்னைவைத்து வாழ்த்திதினம் போற்றிடணும்

வழித்தொல்லை வாராமல்நீ வாஞ்சையுடன் காத்திடணும்

(மதுரை)

--கவிநயா