என்ன விளையாட்டு?

சுபபந்துவராளி ராகத்தில் கீதாம்மாவின் தேனினிய குரலில்.... மிக்க நன்றி கீதாம்மா!
ரொம்ப நாளுக்கப்புறம் சுப்பு தாத்தா  பாடித் தந்திருக்கிறார். அவசியம் கேளுங்கள்! மிக்க நன்றி தாத்தா!

என்ன உன் விளையாட்டு தாயே? எந்தன்

வாழ்வினைக் களமாக்கி மகிழ்பவள் நீயே

(என்ன)

மாயையின் வடிவினளாய் மதிமயக்கம் தருவாய்

ஞானத்தின் வடிவினளாய் மாயத்திரை விலக்கிடுவாய்

(என்ன)

நித்தம் உன்னை நினைந்தும் சித்தமும் கலங்குவதேன்?

பித்துப் பிடித்தது போல் புத்தியும் மயங்குவதேன்?

மாய வடிவை விட்டு மதி மயக்கம் தீராய்

ஞானத்தின் வடிவெடுத்து நல் வழியைத் தாராய்

(என்ன)

--கவிநயா 

அன்னை உன்னை நினைத்தால்!

கீதாம்மா தன் இனிய குரலில்...சாவேரி ராகத்தில்... மிக்க நன்றி கீதாம்மா!

நினைத்த காரியம் கை கூடும்

நடக்கும் யாவையும் நலமாகும்

அன்னை உன்னை நினைத்தால்

உந்தன் அன்பில் திளைத்தால்

(நினைத்த)

வித்தைகள் யாவையும் கைசேரும்

சத்தியம் நெஞ்சிலே நிலையாகும்

அன்னை உன்னை நினைத்தால்

உந்தன் அன்பில் திளைத்தால்

(நினைத்த)

பக்திநம் மனதிலே பயிராகும்

சித்தம் எல்லாம் சிவை மயமாகும்

அன்னை உன்னை நினைத்தால்

உந்தன் அன்பில் திளைத்தால்

(நினைத்த)

பித்தம் எல்லாம் நீயே என்றாகும்

முக்தியும் கூட நம் வசமாகும்

அன்னை உன்னை நினைத்தால்

உந்தன் அன்பில் திளைத்தால்

(நினைத்த)

--கவிநயா 

எல்லாம் உனதருளாலே!

கீதாம்மா தன் இனிய குரலில்...ஆபோகி ராகத்தில்... மிக்க நன்றி கீதாம்மா!

எல்லாம் உனதருளாலே, இந்த

இயற்கையும் உனதருளாலே

உயிர்களும் உனதருளாலே, அவை

வாழ்வதும் உனதருளாலே

(எல்லாம்)

சுவாசிக்கும் காற்றும், அருந்திடும் நீரும்,

தாங்கிடும் புவியும், உன்னாலே

ஆகாய வெளியும், சூர்ய சந்திரரும்,

அக்கினியும் உன்னருளாலே

(எல்லாம்)

பலப்பலப் பிறவியும், இன்பமும் துன்பமும்,

இறப்பதும் நிகழ்வது உன்னாலே

விதியினில் உழல்வதும், விடுபட்டு எழுவதும்

உன்பதம் சேர்வதும் உன்னருளாலே

(எல்லாம்)

--கவிநயா 

கலைகளின் ராணி!

கீதாம்மா தன் இனிய குரலில்...மோஹனம் ராகத்தில்... மிக்க நன்றி கீதாம்மா!

கலைகளின் ராணி கலைவாணி, வெள்ளைக்
கமலத்திலே இருந்து அருள் வேணி
(கலைகளின்)

நாத வடிவானவளே நா மகளே, உந்தன்
பாதங்களை அன்றி வேறு ஏது புகலே?
(கலைகளின்)

வெள்ளை மலரில் ஒரு வெள்ளி நிலவே, எந்தன்
உள்ள மடுவில் உறையும் கொள்ளை எழிலே
அறியாமை தன்னை அழித்திடுவாய், உண்மை
அறிந்திடவே ஆற்றல் அளித்திடுவாய்
(கலைகளின்)


--கவிநயா

திரு மயிலை

கீதாம்மா தன் இனிய குரலில்...ஹம்ஸநாதம் ராகத்தில்... மிக்க நன்றி கீதாம்மா!

அழகு நிறைந்த மயிலே
ஆடி யாடி வாயேன்
உன்னழகில் மயங்கியதால்
உலகில் வந்தாள் தாயே
(அழகு)

அன்றொரு நாள் கயிலையிலே பாடம் நடந்தது, ஒரு
மயிலின் அழகால் அன்னை மனதில் சலனம் வந்தது
கண்ட எந்தை சிவனின் விழிகள் இரண்டும் சிவந்தது, அன்னை
புவியில் பிறவி எடுத்திடவே சாபம் பிறந்தது
(அழகு)

அன்னையவள் உன்னுருவில் புவியில் உதித்தாள்
ஒரு மனதாய்ப் பதியை நினைந்து நாளும் துதித்தாள்
மனங் குளிர்ந்த ஈஸ்வரனைக் கடிமணம் புரிந்தாள்
கயிலையின் மறுவடிவாய்த் திரு மயிலையை அமைத்தாள்
(அழகு)


--கவிநயா