மனதினில் வந்தாய்

மடுவினில் மலர் போலே

 முழுமதி எழில் போலே

  ஒளிகதி ரவன் போலே

   மன தனில் வந்தாயே

சிறுஇதழ் நெளிவாலே

 கடைவிழி அசைவாலே

  திருவடித் துகளாலே

   அருள்பொழி யும்தாயே

மலையரசன் மகளாய்

 சிவனுடனே சிவையாய்

  அரனுடன் அவன் இடத்தில்

    அமர்ந்திருக்கும் தாயே

தேனெனும் உன்நாமம்

 தினமது என்வேதம்

  கதியென உன்பாதம்

   கொள்வதுவே போதும்

--கவிநயா

ஒரு முறை பார்க்க...

உன்னை ஒரு முறை பார்க்க

மடியினில் தலை சாய்க்க

மனமிது ஏங்குது தாயே, அதை

அறிந்து அருள் புரிவாய் நீயே

மானெனும் விழி நோக்க

தேனெனும் மொழி கேட்க

மனமிது ஏங்குது தாயே, அதை

அறிந்து அருள் புரிவாய் நீயே

பரிவுடன் நீ பார்க்க

கனிவுடனே சேர்க்க

மனமிது ஏங்குது தாயே, அதை

அறிந்து அருள் புரிவாய் நீயே

திருமுகம் நான் பார்க்க

கருவிழி நீர் கோக்க

மனமிது ஏங்குது தாயே, அதை

அறிந்து அருள் புரிவாய் நீயே

--கவிநயா

திருநாள்

உனை எண்ணும் நாளெல்லாம் திருநாளே, உன்னை

எண்ணா விட்டால் அது வெறும் நாளே, அம்மா

(உனை)

எண்ணத்திலே வந்து நெஞ்சத்திலே நுழைந்தாய்

கிண்ணத்திலே மதுவாய் இதயத்திலே நிறைந்தாய்

(உனை)

எண்ணியதெல்லாம் தரும் கற்பகத் தருவே

எந்தைச் சிவன் இடத்தில் திகழ்ந்திடும் திருவே

அகந்தையினை அகற்றி அகத்தினில் வருவாய்

குழந்தையென ஏந்தி அன்பினைப் பொழிவாய்

(உனை)

--கவிநயா

அம்மா என்றால் இன்பம்

எத்தனையோ பெயர்களுண்டு அம்மா உனக்கு, உன்னை

அம்மா என்றழைப்பதில்தான் இன்பம் இருக்கு

(எத்தனையோ)

அகிலமெல்லாம் பெற்றதனால் அன்புத் தாயம்மா, பெற்ற

அகிலமெல்லாம் காப்பதானால் அரசி நீயம்மா

(எத்தனையோ)

பலப்பலவாம் பாடல்களால் உன்னை நினைக்கிறேன், அந்தப்

பாடல் கேட்க நீ வரணும் என்று அழைக்கிறேன்

மௌனமாக இருப்பதுதான் உந்தன் தருமமோ, ஒரு

வார்த்தை எனக்குச் சொல்லி விட்டால் முத்து உதிருமோ?

(எத்தனையோ)

--கவிநயா

மலையரசி

மாதா மலையரசி, மங்கள உமையாம்பிகே

வாராய் எனதருகில், இன்னருள் தாராய்

(மாதா)

சந்ததமும் உந்தன் திருப் பெயர் சொல்வேனே

செந்தமிழ்ப் பண்ணாலே உன்புகழ் நெய்வேனே

(மாதா)

வேதமெல்லாம் போற்றும் வித்தகியே உமையே

சோதனைகள் போதும் அம்மா, சொந்தமெனவே வருவாய்

திருப் பத நிழலெனக்கு இதந் தரும் இடமாகும்

பொற் பதம் பணிந்தவர்க்குப் பிறவியும் சுகமாகும்

(மாதா)

--கவிநயா