அழகு முகம் காண ஆவல் கொண்டேன்
பழகு தழிழ்ப் பாடல் பாடி வந்தேன்
பாற்கடல் மாதவன் சோதரியே
பரமசிவனின் ப்ரிய பார்வதியே
(அழகு)
சங்கரி சௌந்தரி நிரந்தரியே
சதுர்முகியே எழில் சியாமளையே
சந்ததமுன் புகழ் பாடுகின்றேன்
சிந்தையிலே வந் தெழுந்தருள்வாய்
(அழகு)
நாயகி நான்முகி நாரணி நீயே
நான்மறை போற்றும் நன்மணி நீயே
ஆதி அந்தம் இல்லா ஜோதியும் நீயே
அகிலத்தைக் காத்திடும் அன்புத் தாயே
(அழகு)
--கவிநயா
அன்புத் தாயே அருகினில் வாயேன்
உன்னை எண்ணி நாளும் உருகிடும் நிலை தாயேன்
(அன்புத்)
வான் பொழியும் மழை வையத்தை நனைப்பது போல்
உனதருள் மழையாலே என் இதயம் நனைக்க
(அன்புத்)
அழகிய திருவதனம் முழுமதி யெனத் துலங்க
அஞ்சேல் அஞ்சேலென்று அபயக் கரம் விளங்க
தந்தேன் நிழலென்று தண்டை யொலி முழங்க
சென்றேன் சென்றேனென்று வல்வினைகள் மலங்க
(அன்புத்)
--கவிநயா
ஏங்கி அழைக்கின்றேன், எழுந்தருள்வாய்!
ஏழை அழைக்கின்றேன், ஏந்திழையே, எழுந்தருள்வாய்!
(ஏங்கி)
பாற்கடல் பரந்தாமன் சோதரி, பார்வதி
பார்த்திட கடைப் பார்வை, தீர்த்திட என் பிறவி
(ஏங்கி)
பணிவில்லை பக்தியில்லை, உன்னை எண்ணும் எண்ணம்
இல்லை
அறிவில்லை, ஆசையில்லை, உன்னிடத்தில் நேசம்
இல்லை
பெரு வெள்ளம் தடுப்பதற்கு, பிள்ளை கட்டும் அணை
போல
நான் செய்யும் கவி கேட்டு, நாயகியே வருவாயோ?
(ஏங்கி)
--கவிநயா
மதுரையிலே வீற்றிருப்பாள்
மனசுக்குள்ளே பூத்திருப்பாள்
மீன் போன்ற விழியால் இந்த
மேதினியைக் காத்திருப்பாள்
மீனாள் எனும் நாமம் கொண்டாள்
ஈசனிடம் காதல் கொண்டாள்
வீரங்கொண்ட இராணியவள்
வேதம் போற்றும் தேவியவள்
திக்விஜயம் செய்தவளாம்
திக்கெட்டும் வென்றவளாம்
தித்திக்கும் தேனவளாம்
எத்திக்கும் நிறைந்தவளாம்
பட்டுப்போல் எழில்மேனி
பரந்திருக்கும் கருங்கூந்தல்
பரமசிவன் மேனியிலே
பாதியான பார்வதியாம்
--கவிநயா
எண்ணாதிருந்தாலும் அருளுவையே, என்னைக்
கண்ணால் பணித்தாண்டு அருள் உமையே
(எண்ணாதிருந்தாலும்)
விண்ணாதி தேவரொடு, மன்னாதி மன்னவரும்
அண்ணன் கோவிந்தனும் அன்னையென வணங்கிடும் நீ
(எண்ணாதிருந்தாலும்)
உலகினில் உழலுகின்றேன், உன்னை எண்ணும்
எண்ணமின்றி
பிறவியில் மயங்குகின்றேன், உன்னைப் போற்ற
நேரமின்றி
பேதையின் புலம்பலுக்குக் கோதை நீ வருவாயோ
வாதையைத் தீர்த்திடவே தாயுன் மடி தருவாயோ
(எண்ணாதிருந்தாலும்)
