சரஸ்வதி அம்மா - நவராத்திரி பாடல்

 

வெள்ளைப் பட்டாடை உடுத்தி

வெள்ளன்னம் மீதமர்ந்து

நான்முகன் நாயகி வலம் வருவாள் - அவள்

பூ மலர் விழி மலர்ந்து அருள் புரிவாள்

 

வெள்ளை மலர் அவள் மேடை

வெள்ளை உள்ளம் அவள் வீடு

கள்ளமில்லா உள்ளந்தனில் குடி புகுவாள் – அவள்

கொள்ளை இன்பங்கள் தந்து அருள் புரிவாள்

 

வீணைதனை மடியேந்தி

ஜப மாலை கரமேந்தி

ஞானத்தின் வடிவாக வீற்றிருப்பாள் – அவள்

அஞ்ஞானந் தன்னை வெல்ல அருள் புரிவாள்

 

ஆயகலை அனைத்துக்கும்

அரசியென ஆனாலும்

தாயெனவே பரிந்துவந்து அன்பு செய்வாள் – அவள்

தயவுடனே நமக்கு அருள் புரிவாள்

 

நான்முகனின் நாவில் இருப்பாள்

நான்மறையின் பொருளில் இருப்பாள்

நா ஒலிக்கும் தமிழிலும் அவள் இருப்பாள் – அவள்

நாத வடிவாக எங்கும் நிறைந்திருப்பாள்

 

 

--கவிநயா

துர்க்கை அம்மா - நவராத்திரி பாடல்

மீனாட்சி அம்மை பாடல் நவராத்திரி முடிந்த பிறகு தொடரும்...

துர்க்கை உன்றன் பேரைச் சொன்னால்

    துன்பம் எல்லாம் தீரும்

தூரப் போகும் வினைக ளெல்லாம்

    இன்பம் வந்து சேரும்

சூலம் கொண்ட கோலம் கண்டால்

    கண்களிலே நீரும்

வழியுதடி துர்க்கை அம்மா

    தேடி வந்தேன் பாதம்

 

அசுர்ர்களை அழிக்கையிலே

    ஆங்காரத் தோற்றம்

அன்புடனே காக்கையிலே

    அன்னையென மாற்றம்

உன் நிழலில் தங்கிடவே

    எனக்கு என்றும் ஏக்கம்

உன் கமலத் திருப்பதமே

    எம்மை என்றும் காக்கும்

 

சங்குடனே சக்கரம் உன்

    சோதரனைப் போலே

சந்திரனைச் சூடிடுவாய்

    காதலனைப் போலே

தீயவற்றைக் கண்டு விட்டால்

    தீயதனைப் போலே

வேகங் கொண்டு வந்திடுவாய்

    சிம்மமதன் மேலே

 

பதினெட்டுக் கரங்களிலே

    ஆயுதங்கள் சொண்டாய்

ஈரெட்டுத் திசைகளிலும்

    அசுரர்களை வென்றாய்

ஆயிரமாம் கண்களினால்

    அன்பர்களைக் காப்பாய்

அண்டி வரும் அடியவரைத்

    திருவடியில் சேர்ப்பாய்

 

 

--கவிநயா

தாமரை மலரே!

தாமரை மலரே தாமரை மலரே
தாயினைத் தாங்கிடும் பேறு கொண்டாய்
தாயவள் பூம்பதம் தாங்கிடத்
தாமரை மலரே நீயென்ன தவம் செய்தாய்?
(தாமரை)

தாமரை திருப்பதம் தாமரை தளிர்க்கரம்
திருமுகமும் எழில் தாமரையே
தேடிடும் என்மனம் நாடிடும் அவள்பதம்
பாடிடும் தினம் அவள் திருப்புகழே
(தாமரை)

அன்னங்கள் நாணிடும் நடையழகில்
சொர்ணமும் மயங்கிடும் அவள் எழிலில்
வீணை குழைந்திடும் அவள் கரத்தில்
வேதங்கள் கிடந்திடும் திருப்பதத்தில்

கலைகளின் ராணி கலைவாணி
காந்த விழிகொண்ட எழில்வேணி
நாளும் அவள் பாதம் போற்றிடுவோம்
ஞான ஒளி நம்மில் ஏற்றிடுவாள்
(தாமரை)

--கவிநயா

அழகு ராணி

செந்தாமரை எழில் ராணி, உந்தன்

கண் தாமரையால் அருள் பொழிந்திட வா நீ

(செந்தாமரை)

பாற்கடலில் உதித்தாய், பரந்தாமனை வரித்தாய்

எண் வடிவம் எடுத்தாய், செல்வம்பல அள்ளிக் கொடுத்தாய்

(செந்தாமரை)

மாதவன் மார்பினிலே மலர்ந்திருக்கும் கமலை

மாதவர் யாவருக்கும் மகிழ்ந்தளிப்பாள் அருளை

திருவடிச் சேவையினில் இலயித்திருக்கும் கோதை

திருவடி பணிந்து விட்டால் காட்டிடுவாள் பாதை

(செந்தாமரை)

--கவிநயா

" நவமியில் அருளுவள்."

அனைவருக்கும் இனிய நவராத்திரி நல் வாழ்த்துகள்!

கீழே உள்ள பாடல், நவராத்திரிக்கெனெ VSK என்னும் திரு.டாக்டர்.சங்கர்குமார் அவர்கள் எழுதித் தந்தது. நன்றி அண்ணா.

நவமிவள் நலமிவள் நமக்கென வருபவள்
தவமிவள் தலமிவள் தனக்கிணை இலதிவள்
பவமிவள் பரமிவள் பரமனின் இடமிவள்
சிவமிவள் சுகமிவள் நவமியில் அருளுவள். 1

அருளிவள் அழகிவள் அகமிவள் அமிழ்திவள்
திருவிவள்  துணிவிவள் திறமிவள் திட‌மிவள்
கருவிவள் கதியிவள் கருத்தினில் உறைபவள்
குருவிவள் குலமிவள் நவமியில் அருளுவள். 2

மனமிவள் மகிழ்விவள் மலரிவள்  மறையிவள்
தனமிவள் துணையிவள் துயரிவள் களைபவள்
நனவிவள் நினைவிவள் நிகழ்விவள் நிலமிவள்
எனதிவள் எழிலிவள் நவமியில் அருளுவள். 3

உருவிவள் உலகிவள் உயர்விவள் உயிரிவள்
பெருவிவள் பெயரிலள் பெரிதினும் பெரியவள்
மருவிவள் மதியிவள் முகிழ்விவள்  மிகையிவள்
இருளிவள் பகலிவள் நவமியில் அருளுவள். 4

முதலிவள் முடிவிவள் முதலெழுத் தானவள்
பதமிவள் புதியவள் பொலிவிவள் புகழிவள்
இதமிவள் இனியவள் இசையிவள் இசைவிவள்
சதமிவள் துதியிவள் நவமியில் அருளுவள். 5

செயலிவள் செகமிவள் செயமிவள் சுயமிவள்
தயவிவள் தகவிவ‌ள் திசையிவள் தெரிவிலள்
பயமிவள் தீர்ப்பவள் பலமிவள் தருபவள்
அயமிவள் அசைவிவள் நவமியில் அருளுவள்  . 6

குணமிவள் குறைவிலள் களியிவள் கருத்திவள்
உணவிவள் உடையிவள் உரமிவள் உணர்விவள்
மணமிவள் மலைமகள் மல‌ரினும் மெலியவள்
கணமிவள் கனியிவள் நவமியில் அருளுவள். 7

வேரிவள் வலியிவள் வகையிவள் வழியிவள்
தேரிவள் ஏறுவள் சூரிவள் அழிப்பவள்
கூரிவள் தாங்குவள் பாரிவள் காப்பவள்
போரிவள் வெல்பவள் நவமியில் அருளுவள். 8

ஒன்றிவள் இரண்டிவள் மூன்றிவள் மலைமகள்
நான்கிவள் ஐந்திவள் ஆறிவள் அலைமகள்
ஏழிவள் எட்டிவள் நவமிவள் துர்க்கையள்
ஊழிவள் உமையவள் உருவினள் லலிதையள். 9

வானிவள் மழையிவள் பொழிவதில் மகிழ்பவள்
தானிவள் தருபவள் தருவதில் மகிழ்பவள்
நானிவள் பதமலர்ப் பணிந்திட மகிழ்பவள்
காணிவள் சீரெலாம் கூறுதற் கரியதே!  10.

ஓம் ஸ்ரீ லலிதாம்பிகாயை நம:

வாழ்க சீரடியாரெல்லாம்.
முருகனருள் முன்னிற்கும்.

மிகை, v. n. & s. abundance
தகவு (p. 471) [ takavu ] , v. n. (from தகு), fitness, தகுதி.
அயம் (p. 25) [ ayam ] {*},  festival; & good luck, favourable, fortune caused by deeds in former births, நல்வினை.

சகலகலாவல்லியே...!

தர்பாரி கானடா ராகத்தில் சுப்பு தாத்தா அமைத்துத் தந்ததைக் கேட்டு மகிழுங்கள்! மிக்க நன்றி தாத்தா!
 

சகலகலா வல்லியே – உனைப் பாட

தீந்தமிழ் வரும் துள்ளியே

(சகலகலா)

பண்ணிசை உனைப் பாட

எண்திசை உனை வாழ்த்த

கண்மிசை நீர் பெருக

என்திசை நீ பார்க்க

(சகலகலா)

ஒவ்வொரு கலையிலும் உள்ளொளிர்ந்திருப்பாய்

வேதத்தின் நாதமாய் நீ ஒலித்திருப்பாய்

நான்முகன் நாவினில் நீ குடியிருப்பாய்

நற்றமிழ் நான்பாட அகம்மகிழ்ந்திருப்பாய்

(சகலகலா)

--கவிநயா

நன்றி: வல்லமை 
 

துர்க்கை என்னும் நாமம்!

அனைவருக்கும் இனிய நவராத்திரி வாழ்த்துகள்!

சுப்பு தாத்தா ஆனந்த பைரவி ராகத்தில் ஆனந்தமாகப் பாடித் தந்ததை ஆனந்தமாகக் கேட்டு மகிழுங்கள்! :) மிக்க நன்றி தாத்தா!

துர்க்கை என்னும் பேரைச் சொன்னால் துன்பம் மிரண்டு போகுமே!

நற்சொல்லாகி நாவில் நின்று நாளும் நம்மைக் காக்குமே!

துர்க்கை என்னும் பேரைச் சொன்னால் தீமை ஓடிப் போகுமே!

நற்பலன்கள் நம்மைத் தேடி வந்து நன்மை சேர்க்குமே!

துர்க்கை என்னும் பேரைச் சொன்னால் அச்சம் அச்சம் கொள்ளுமே!

நற்றுணையாய் நிமிடந் தோறும் கூட நின்று காக்குமே!

துர்க்கை என்னும் பேரைச் சொன்னால் சஞ்சலங்கள் விலகுமே!

சத்தியத்தைக் காட்டி நம்மின் சோதனைகள் தீர்க்குமே!

துர்க்கை என்னும் பேரைச் சொன்னால் வினைகள் யாவும் தீருமே!

வித்தை போல நல்லவற்றைத் தந்து நம்மைக் காக்குமே!

துர்க்கை என்னும் பேரைச் சொன்னால் தோல்வி தோற்றுப் போகுமே!

நிற்க என்று சொல்லி வெற்றி நம்மை வந்து பற்றுமே!

துர்க்கை என்னும் நாமம் சொன்னால் அமைதி நெஞ்சில் கூடுமே!

ஆனந்தமே ஆனந்தமாய் நம்மை வந்து சேருமே!

கற்க என்று காலன் வந்து பாடம் சொல்லும் முன்னமே

துர்க்கை நாமம் நெஞ்சில் வைக்க என்றும் நன்மை நன்மையே!

-கவிநயா

நான்முகனின் நாயகி!

சுப்பு தாத்தா பாடித் தந்ததை கேட்டுக் கொண்டே வாசியுங்கள்... மிக்க நன்றி தாத்தா!


வெள்ளைஉள்ளத் தாமரையில் வீணையுடன் வீற்றிருப்பாள்
சொல்லும்மொழி யாவையிலும் சுந்தரமாய் கொலுவிருப்பாள்

பள்ளந்தனைத் தேடிவரும் வெள்ளமதைப் போலவளும்
உள்ளம்நிறை அன்பு செய்தால் உவந்துடனே அருள்வாள்

நானிலத்தை ஆக்குகின்ற நான்முகனின் நாயகியாம்
நான்மறைக ளும்வணங்கும் ஞானவடி வானவளாம்
வானவரும் தானவரும் போற்றுகின்ற தேவியளாம்
காணவரும் அடியவரைப் பேணுகின்ற தாயவளாம்


--கவிநயா

உன் பாதம் சரணம்!

சூலம் ஏந்திக்கொண்டு சூலியவள் நம்மை காத்து நிற்கிறாள்
சூழும் பகைதன்னை விரட்டித் துரத்திடவே பார்த்து நிற்கிறாள்
கால தேவனையும் அடக்கி ஆளுபவள் காளி தேவியே
ஞாலம் யாவையுமே போற்றிப் பணியுமவள் புகழைப் பாடியே!

சண்டி என்றாலும் அண்டி வருவோரைக் காத்து நிற்பவள்
கண்டைப் போலவே இனிக்கும் அன்புதனைக் கொடுத்து நிற்பவள்
தீமை அவளைக்கண்டால் தீயைக் கண்டதுபோல் தூர ஓடுமே
நாவை துருத்திவரும் நங்கை அவளைக்கண்டால் நடுங்கிச் சாகுமே!

அன்னை என்றுதன்னை அன்பு செய்வோரைக் காத்து நிற்பவள்
பிள்ளை இவனென்று அணைக்கும் அன்பினிலே கனிந்து நிற்பவள்
சக்தி உன்றன் திருப்பாதம் சரணென்ற எண்ணம் போதுமே
பக்தர் தமைக்காக்க சூலம் அரணென்று வந்து சேருமே!


--கவிநயா

ஓம் ஓம் ஓம் !

சிம்ம வாஹினி காந்த ரூபிணி சத்ய ஜோதிநீ
ஓம் ஓம் ஓம்!
சண்டி காளி நீ கமல வாசினி கர்ம நாசினி
ஓம் ஓம் ஓம்!

நெற்றிக் கண்ணிலே நெருப்பை உமிழ்ந்தபடி
நீலியாக வந்து நின்றவளே!
பற்றிக் கொண்டவரின் துயரம் போக்கவே
சூலமேந்தி பகை வென்றவளே!

பகைவர் நடுங்கவே பதினெண் கரங்களில்
படைக்கலம் தாங்கி வந்தவளே!
உலகம் உய்யவே ஊழிக்காற்று போல்
உக்கிர வேகம் கொண்டவளே!

கொடிய அசுரரைக் குத்தி கிழித்து அவர்
உதிரம் உறிஞ்சியே களிப்பவளே!
பணியும் அடியவர் பாவந் தொலையவே
கனிந்த அன்பினை அளிப்பவளே!

அணிகள் ஜொலித்திருக்க சிலம்பும் ஒலித்திருக்க
அரனுடன் திருநடம் இடுபவளே!
கணங்கள் சூழ்ந்திருக்க நிதமும் புகழ்ந்திருக்க
கயிலை நாதனுடன் திகழ்பவளே!

உள்ளம்ஒன்றி தினம் உந்தன் நாமந்தனை
ஓதும் அன்பினிலே மகிழ்பவளே!
வெள்ளம் போலப்பொங்கி பெருகும் கருணையினால்
விரைந்து ஓடிவந்து அருள்பவளே!

துக்கம் அகற்றவே துர்க்கை வடிவிலே
தோற்றம் கொண்டுவந்த தூயவளே!
பக்கம்நின் றெம்மைக் காக்க வேண்டியே
பாதம் பணிகின்றோம் பூமகளே!!


--கவிநயா

சுப்பு தாத்தாவின் குரலில் - நன்றி தாத்தா!